ލަންކާގައި އެތައް ދިވެހިންނެއް ހާލުގައި ޖެހިފައި، އެމްބަސީއަކަށް ނުގުޅޭ!

ކޮވިޑް-19 ބަލިމަޑުކަން ދުނިޔޭގެ އެކި ހިސާބުތަކުގައި ގަދައަށް ފެތުރެމުން ދާއިރު، މި ބަލީގެ ސަބަބުން އެކި ގައުމުތަކުގައި ތިބި ދިވެހިންވެސް ހާލުގައި ޖެހިފައި އެބަވެއެވެ. ނޭޕާލާއި، ފިލިޕީންސް، މެލޭޝިއާ ލަންކާ އަދި ޕާކިސްތާނުން ވެސް ހިމެނެއެވެ. މިފަހަރު ލަންކާގެ ހާލަތަށް ބަލާލަމާ ހިނގާށެވެ.

ކޮވިޑް-19އާ ގުޅިގެން ލަންކާގައި މިހާރު ވަނީ ކާފިއު އިއުލާނު ކޮށްފައެވެ. ގެއިން ބޭރަށް ނިކުމެ އުޅުމުގައި ވަކި ވަގުތުތަކެއް، ކަނޑައާޅާ، ކޮންމެ ގޭބިސީއަކުން ވެސް ޒަރޫރީ ބޭނުންތަކަށް ބޭނުންވާ ސާމާނު ހޯދުމަށް ފިހާރަތަކަށް ޒިޔާރަތް ކުރުމުގައި ވެސް ވަކި ގޮތްތަކެއް ގެންގުޅޭ ގޮތަށް ހަމަޖައްސާފައެވެ. އަދި ފިހާރަތަކަށް ވިޔަފާރި ކުރުމަށް ގޮސް އުޅުމުގައި ވެސް ވަކި ގޮތްތަކެއް އެގައުމުން ވަނީ ކަނޑައަޅާފައެވެ.

ފިހާރަތަކަށް ޒިޔާރަތް ކުރާ މީހުންނަށް އޮންނަ ގޮތަކީ، ފިހާރައަށް ވަނުމަށް ކިއު ހަދާފައި ހުންނައިރު، 1 މީޓަރުގެ ހުސްޖާގައެއް ދެމީހުން ދެމެދުގައި ބެހެއްޓުމެވެ. އަދި ވަކި ވަރަކަށް މީހުން ފިހާރަތެރެއަށް ވެއްދުމަށް ފަހު ފިހާރަ ބަންދުކޮށްލަނީއެވެ. ފިހާރައަށް ވަންނަ މީހުން ބާޒާރުކޮށް ނިމުމުން އަނެއްކާވެސް އިތުރު ބަޔަކު ފިހާރައަށް ވައްދަނީއެވެ. މިފަދަ ހާލެއްގައި ވިޔަފާރި ކުރުމުގެ ފުރުސަތު ލިބުނުއިރުވެސް، ކިއުގައި އެތައް ގަޑިއިރަކު ތިބުމަށްފަހު ފިހާރައަށް ވަން އިރު، ހުރިހާ އެއްޗެއް ހުސްވެގެން، ކާނެ އެއްޗެއް ނުލިބި ވެސް އެތައް ބަޔަކު އެބަތިއްބެވެ.

ލަންކާގައި ތިބި ދިވެހި އާއިލާއަކުން 'ދަ ޕްރެސް' އަށް މައުލޫމާތު ދެމުން ބުނީ، ލަންކާގައި އިއުލާންކޮށްފައިވާ ކާފިއުއަށް ލުޔެއް ދިނުމުން، އެ އާއިލާއިން ވެސް ކާއެއްޗެހި ހޯދުމަށް ފިހާރަތަކަށް ދިޔަ ކަމަށެވެ. ނަމަވެސް އެތައް ގަޑިއިރަކު ކިއުގައި ހުރުމަށްފަހު، ފިހާރައަށް ވަންނައިރު، ފިހާރަ ހުސްވެފައި ހުންނަ ކަމަށެވެ. އަދި މިފަދައިން އެތައް ފިހާރައަކަށް ހިނގައިގެން ލިބުނީ 3 ޕެކެޓު ކޭކު ކަމަށް އޭނާ މައުލޫމާތުދެއެވެ.

3 ކުޑަކުދިންނާއި އުމުރުން ދުވަސްވީ މީހަކު ހިމެނޭ ގޮތަށް ލަންކާގައި ދިރިއުޅޭ މި އާއިލާއިން ބުނީ، ފިހާރަތަކަށް ޒިޔާރަތް ކުރުމަށްފަހު އަނބުރާ ގެއަށް ދެވުނުއިރު، ފެން ވެސް ކަނޑާލާފައިވާ ކަމަށެވެ. އަދި ގޭގައި ކުރިން ހުރި އެއްޗެހިން ކާއެއްޗެއް ތައްޔާރު ކުރެވޭތޯ ބެލިއިރު، ގޭގައި ގޭސް ހުސްވެފައިވާ ކަމަށް އޭނާ މައުލޫމާތުދެއެވެ.

ހާލުގައި ޖެހިފައިވާ މި އާއިލާއިން ބުނީ، ކާއެއްޗެއް ނުލިބުމުން، އާއިލާ ބަޔަކު އުޅޭ އެހެން ގެއަކަށް ދިއުމަށް ދަތުރުފެށި ކަމަށެވެ. އޭރު ގަޑިން 2:30 ވެފައިވާ ކަމަށް އޭނާ ބުނާއިރު، ލަންކާގައި އިއުލާން ކޮށްފައިވާ ކާފިއުއަށް ލުއިދީފައި އޮތް ސުންގަޑި ހަމަވީ ލަންކާ ގަޑިން މެންދުރު 2:00 ޖެހިއިރުއެވެ. ފުދޭވަރަކަށް ދުރުގައި ހުންނަ ގެއަކަށް މި އާއިލާއިން ދަތުރުފެށީ، 3 ކުޑަކުދިންނާއި އުމުރުން ދުވަސްވީ ބަލި މީހަކާއެކުއެވެ. އަދި ކުރޮޅިއެއް ނުލިބިގެން ވަރަށް ދުރަށް ހިނގާފައި ދާން ޖެހުނު ކަމަށް ވެސް އޭނާ ބުނެއެވެ.

ލަންކާގައި ކާފިއު އިއުލާންކޮށްފައިވުމާ ގުޅިގެން މަގުމަތީގައި އުޅުމުގެ ހުއްދަ ލިބެނީ ވަކި ވަގުތެއްގައި، ކާފިއުއަށް ލުއި ދިނުމުންނެވެ. އަދި ޒަރޫރީ ބޭނުންތަކަށް ބޭނުންވާ ތަކެތި ގަތުމަށް މިއަދު ކާފިއުއަށް ލުއި ދީފައިވާއިރު، ދެން މި ފުރުސަތު ދިނުމަށް ނިންމާފައި ވަނީ އަންނަ ހުކުރުދުވަހެވެ.

ލަންކާގައި ތިބި ބައެއް ދިވެހިން ހާލުގައި ޖެހިފައިވާއިރު، އެ ފަރާތްތަކުން ބުނާގޮތުން، ލަންކާގައި ހުންނަ ރާއްޖޭގެ އެމްބަސީއާވެސް ގުޅޭގޮތް ވަނީ ނުވެފައެވެ. އަދި އެތައް ފަހަރަކު ގުޅިއިރުވެސް އެމްބަސީއަށް ގުޅޭ ގޮތް ނުވާ ކަމަށް އެ ފަރާތްތަކުން މައުލޫމާތުދެއެވެ. މިކަމާ ގުޅިގެން ރާއްޖޭގެ ކަމާބެހޭ ފަރާތްތަކުން ބުނީ، ގިނަ ފަރާތްތަކުން އެ ނަންބަރަށް ގުޅަމުންދާތީ، އެ ނަންބަރު ބިޒީ ވެދާނެ ކަމަށެވެ. އަދި ލަންކާގައި ތިބި ދިވެހިން އެމްބަސީގައި ރަޖިސްޓްރީ ކުރުމަށާއި، އެހީތެރިކަން ފޯރުކޮށްދޭނެ ކަމަށް އެ ފަރާތްތަކުން ބުނެއެވެ. އެގޮތުން، ކާއެއްޗެހި ނުލިބި ތިބި ފަރާތްތަކަށް ކާއެއްޗެހި ވެސް ފޯރުކޮށްދިނުމަށް ނިންމާފައިވާ ކަމަށް އެ ފަރާތްތަކުން ބުނެއެވެ.