ކޮވިޑް-19އާ ގުޅިގެން އެކްސްކާޝަންގެ ގޮތުގައި ތަންތަނަށް ދިއުން ހުއްޓުވި މުއްދަތު އިތުރުކޮށްފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ނެރުނު އިއުލާނެއްގައި ބުނީ، އެކްސްކާޝަންގެ ގޮތުގައި ރިސޯޓަކުން، ގެސްޓްހައުސްއަކުން ނުވަތަ ސަފާރީއަކުން، ރާއްޖޭގެ އެއްވެސް ރަށަކަށް މީހުން އައުމާއި ދިއުން ހުއްޓާލުމަށް އަންގާ ކަމަށެވެ. އެޗްޕީއޭން މި ނިންމުމުގެ މުއްދަތު އިތުރުކޮށްފައި ވަނީ މުއްދަތެއް ނެތް ގޮތަށެވެ.
އެޗްޕީއޭން މި ނިންމުން ނިންމާފައި ކޮވިޑް-19 އިން ރައްކާތެރިވުމަށް އާންމު ސިއްހަތު ރައްކާތެރިކުރުމުގެ ގާނޫނުގެ 34 ވަނަ މާއްދާގެ (ހ)ގެ ދަށުން ޑިރެކްޓާ އޮފް ޕަބްލިކް ހެލްތަށް ލިބިފައިވާ ގާނޫނީ ބާރުގެ ދަށުންނެވެ.
މީގެ އިތުރުން އެޗްޕީއޭން ވަނީ ގްސްޓްހައުސްތްކާއި، ރިސޯޓްތައް އަދި ސަފާރީތަކާއި އެނޫންވެސް އެކްސްކާޝަންތައް ރާވާ އޮޕަރޭޓް ކުރާ ފަރާތްތައް އަދި ކަމާ ބެހޭ އިދާރާތަކަށް މި ނިންމުމާ އެއްގޮތަށް އަމަލު ކުރުމަށް އަންގާފައެވެ.
ކޮވިޑް-19 އިން ރަނގަޅުވި 3 މީހުންގެ ތެރެއިން ދެ މީހުންނަކީ ސޭންޑީސް ބަތަލާ މޯލްޑިވްސް ރިސޯޓުގައި ޗުއްޓީ ހޭދަ ކުރަމުން ދަނިކޮށް ޕޮޒިޓިވްވި ދެ މީހުންނެވެ. އެ ދެ މީހުންނަކީ އިޓަލީއަށް ނިސްބަތްވާ އުމުރުން ދުވަސްވީ ދެމަފިރިންނެވެ. 3 ވަނަ އަށް ރަނގަޅުވި މީހާއަކީ، ކުރެއްދޫ އައިލެންޑް ރިސޯޓުގެ ޑޮކްޓަރެވެ.
