ސަރުކާރު ބަންދުކުރެއްވުމުގެ އެންމެ ބޮޑު ބޭނުމަކީ ކޮވިޑް-19 ކޮންޓްރޯލް ކުރެއްވުން ކަމަށްވާތީ، އިޖުތިމާޢީ ގައިދުރުކަން ނުވަތަ ސޯޝަލް ޑިސްޓެންސިންގ ތަންފީޒުކުރުމަށްޓަކައި، ސަރުކާރުގެ އިދާރާތަކުގެ މުވައްޒަފުން، ޟަރޫރީ ބޭނުމެއްގައި މެނުވީ ގެއިން ބޭރަށް ނުކުމެ ނޫޅުމަށް ރައީސް އޮފީހުން މިއަދު އަންގައިފިއެވެ.
ރައރީސް އޮފީހުން މިހެން މިކަން އަންގާފައިވަނީ، ކޮވިޑް-19 އާ ގުޅިގެން ސަރުކާރުން އަޅާ ހާއްސަ ފިޔަވަޅުތަކާ ގުޅޭގޮތުން އެ އޮފީހުން މިއަދު ނެރުނު ދެންނެވުމެއްގައެވެ. އެ ދެންނެވުމުގައި ވަނީ، ކޮވިޑް-19 ފެތުރެމުންދާތީ، ފިޔަވަޅުތަކެއް އަޅަން ނިންމާފައިވީ ނަމަވެސް ރައްޔިތުންނަށް ކޮންމެހެން ބޭނުންވާ ހިދުމަތްތައް މެދުނުކެނޑި ރައްޔިތުންނަށް ލިބޭނެ އިންތިޒާމު ހަމަޖެހިފައިވާކަމަށެވެ.
ރައްޔިތުންނަށް ކޮންމެހެން ބޭނުންވާ ހިދުމަތްތައް މެދުނުކެނޑި ރައްޔިތުންނަށް ލިބޭނެ އިންތިޒާމު ހަމަޖެއްސުމަށް އަންގާފައިވާ މުއައްސަސާތައް:
- ސިއްހީ ހިދުމަތްދޭ މަރުކަޒުތަކާއި ފާމަސީތަކުގެ ހިދުމަތްތައް
- ފެނާއި، ކަރަންޓާއި، ނަރުދަމާގެ ހިދުމަތް
- ބްރޯޑްކާސްޓިންގެ ހިދުމަތް
- ފޯނާއި އިންޓަނެޓްގެ ހިދުމަތް
- ބޭންކުތަކުން ދޭ ހިދުމަތް
- ކައްކާ ގޭހާއި ފިޔުލްގެ ހިދުމަތް
- ވައިގެ ދަތުރުފަތުރުގެ ހިދުމަތްތަކާއި ވިޔަފާރި ބަނދަރުތަކުގެ ހިދުމަތް
- ކަސްޓަމްސްއާއި އިމިގްރޭޝަނާއި އޭވިއޭޝަން ކޮމާންޑުގެ ހިދުމަތް
- ސިފައިންނާއި ފުލުހުންގެ ހިދުމަތް
- ފަޔާ އެންޑް ރެސްކިއުގެ ހިދުމަތް
- އަދުލު އިންސާފު ގާއިމުކުރުމުގެ ބާރުގެ ހިދުމަތާއި ކޯޓުތަކުގެ ހިދުމަތް
- ހާރިޖީ ގުޅުންތަކާބެހޭ ހިދުމަތް
- އިޖްތިމާއީ ރައްކާތެރިކަން ފޯރުކޮށްދިނުމުގެ ހިދުމަތް
- ދައުލަތުގެ ބެލުމުގެ ދަށުގައި ބައިތިއްބައިގެން މީހުންނާއި ކުދިން ބަލަހައްޓާ މަރުކަޒުތަކުން ދޭ ހިދުމަތް
- ޖަލުތަކުގެ ހިދުމަތް
- ރަށް ކުނިކަހައި ބެލެހެއްޓުމުގެ ހިދުމަތާއި، ކުނިނަގައި އުކާލުމުގެ ހިދުމަތް
- މޫސުމާބެހޭ ހިދުމަތް.
މި ހިދުމަތްތައް ދިނުމުގެ އިންތިޒާމު ހަމަޖެއްސުމަށްޓަކައި ދައުލަތުގެ އިދާރާއަކުން ކޮންމެހެން މަސައްކަތަށް ނެރޭ މުވައްޒަފުންނާއި، އާންމު ސިއްހަތު ރައްކާތެރިކުރުމުގެ ގާނޫނުގެ 33 ވަނަ މާއްދާގެ ދަށުން މިމަހު 12 ވަނަ ދުވަހު އިއުލާނުކޮށްފައިވާ "އާންމު ސިއްހަތުގެ ކުއްލި ނުރައްކަލުގެ ހާލަތު" ގައި، ޑިރެކްޓާ ޖެނެރަލް އޮފް ޕަބްލިކް ހެލްތް ކަނޑައަޅާ ފިޔަވަޅުތައް އެޅުމަށްޓަކައި ދައުލަތުގެ އިދާރާތަކުން ކުރަންޖެހޭ ކަންތައްތައް ކުރުމަށް މަސައްކަތަށް ނެރުއްވާ މުވައްޒަފުން ފިޔަވައި އެހެން މުވައްޒަފުން މަސައްކަތަށް ނުނެރުއްވުމަށް ވެސް ވަނީ އަންގާފައި ކަމަށް ރައީސް އޮފީހުން ބުނެއެވެ.
ރައީށް އޮފީހުން ބުނީ، ސަރުކާރު ބަންދުކުރާ މުއްދަތުގެ ތެރޭގައި ދައުލަތުގެ އިދާރާއަކުން ކޮންމެހެން ދޭންޖެހޭ ހިދުމަތެއް ދިނުމަށްޓަކައި، އެ އިދާރާއެއްގެ އެންމެ އިސްވެރިއަކު ކަނޑައަޅާ ގޮތެއްގެ މަތިން އެ އިދާރާއަކުން ކުރަންޖެހޭ މަސައްކަތްތައް ކުރުވުމަށްވެސް އަންގާފައިވާނެ ކަމަށެވެ.
ކޮވިޑް-19 އާ ގުޅިގެން، ސަރުކާރުން އަޅާ ފިޔަވަޅުތައް އެޅުމަށް ދައުލަތުގެ އިދާރާތަކުން ކުރަންޖެހޭ އެންމެހައި ކަންކަން ކުރަމުން ގެންދިއުމަށްވެސް ދައުލަތުގެ މުއައްސަސާތަކަށް ރައީސް އޮފީހުން ވަނީ އަންގާފައެވެ.
ކީކޭ ދެން ބުނާނީ