ސްރީލަންކާގެ ކޮޅުނބުގައި ހުންނަ ރާއްޖޭގެ ހައިކޮމިޝަން މިއަދު ބަންދުވާނެ ކަމަށް އެ ކޮމިޝަނުން ބުނެފިއެވެެ.
ހައިކޮމިޝަނުން ބުނީ، ކޮވިޑް-19 ހަލުވިކަމާއެކު ފެތުރެމުން ދާރީ، ސްރީލަންކާގެ ސަރުކާރުން އަޅަމުންގެންދާ ފިޔަވަޅުތައް އިތުރަށް ހަރުދަނާކުރުމުގެ ގޮތުން، މިއަދަކީ ބަންދު ދުވަހެއް ކަމަށް ލަންކާ ސަރުކާރުން ވަނީ އަންގާފައި ކަމަށެވެ. އެހެން ކަމުން މިއަދު ލަންކާގައި ހުންނަ ހައިކޮމިޝަންވެސް ބަނދުވާނެ ކަމަށް އެ ކޮމިޝަނުން ބުނެއެވެ.
އެ ކޮމިޝަނުން ނެރުނު ބަޔާނެއްގައި ބުނީ، އިމަޖެންސީ ކޮންސިއުލާ ހިދުމަތެއް ބޭނުންވެއްޖެނަމަ، ހައިކޮިޝަން ބަންދިވިޔަސް، އެ ކޮމިޝަނުގެ ހޮޓްލައިން ނަންބަރު، 0768816666 އަށް ގުޅޭނެ ކަމަށެވެ.
އިމަޖެންސީ ކޮންސިއުލާ ހިދުމަތަކަށް ކޮމިޝަނަށް ދާން ޖެހިއްޖެ ހާލަތެއްގައި ހޮޓަލއިނަށް ގުޅާ، މައުލޫމާތު ސާފުކުރުމަށްފަހު އެޕޮއިންޓްމަންޓް ހެއްދުމަށް ހައިކޮމިޝަނުން ވަނީ އެދިފައެވެ. އަދި އެޕޮއިންޓްމަންޓް ހަދައިގެން ހައިކޮމިޝަނަށް ދިއުމުން، ދޭންވާ އެމަޖެންސީ ސޮންސިއުލާ ހިދުމަތް ވީހާވެސް އަހަކަށް ފޯރުކޮށްދިނުމަށާއި ހައްލު ލޯދުމަށް ހައި ކޮމިޝަނަށް މަގުފަހިވާނެ ކަމަށް އެ ކޮމިޝަނުން ބުނެއވެެ.
ލަންކާގެ ކޮޅުނބުގައި ހުްނނަ ރާއްޖޭގެ ހައި ކޮމިޝަނުން މިހެން ބުނެފައިވާއިރު، ސްރީލަންކާއިން ކޮވިޑް-19ގެ ކޭސްތައް ފެންނަ މިންވަރު އިތުރުވާން ފެށުމާއެކު މިއަދުން ފެށިގެން ބުރާސްފަތި ދުވަހުގެ ނިޔަލަށް ސަރުކާރު ބަންދު ކުރުމަށް ސްރީލަންކާއިން ވަނީ ނިންމާފައެވެ. މި ނިންމުމަކީ ޕްރައިވެޓް ސެކްޓާ ކުންފުނިތަކަށްވެސް ހިނގާނެ ގަވާއިދެއް ކަމަށް ސްރީލަންކާގެ ކަމާބެހޭ ފަރާތްތަކުން ވަނީ ކަނޑައަޅާފައެވެ. އަދި އެކަން އެގޮތަށް ކޮށްދިނުމަށްވެސް ސްރީލަންކާގެ ސަރުކާރުން ވަނީ އެދިފައެވެ.
ސްރީލަންކާގައި ރަސްމީ ހަފުތާ ގުނަނީ ހޯމައިން ހުކުރަށް ކަމަށްވާއިރު މި ހަފުތާގެ ހޯމަ ދުވަހުވެސް ސަރުކާރު ވަނީ ބަންދުކޮށްފައެވެ. ސަރުކާރު ބަންދު މުއްދަތު އިތުރުކޮށްފައިވަނީ ކޮވިޑް-19ގެ ހާލަތު މޮނިޓާ ކުރުމަށް ކަމަށް މައުލޫމާތު ލިބެއެވެ.
ގާތްގަނޑަކަށް ހަފުތާއެއްހާ ދުވަހުގެ ތެރޭގައި ސްރީލަންކާއިން ކޮވިޑް-19އަށް ޕޮޒިޓިވްވި މީހުންގެ އަދަދު ވަނީ 28 އަށް އަރާފައެވެ.
