ޓޫރިސްޓް ސަޕޯޓް ސެންޓަރެއްގެ ގޮތުގައި ހުޅުލޭ އައިލެންޑް ހޮޓެލް (އެޗްއައިއެޗް) ހަަމަޖައްސައިފިއެވެ.
މިރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަަމުން ކޮވިޑް-19 އާ ގުޅޭ ގޮތުން މައުލޫމާތު ދެއްވާ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ، މީގެ ކުރިންވެސް އެޗްއައިއެޗް އާއެކު މަޝްވަރާކުރެވެމުންދާކަން ހާމަކޮށްފައި ވާނެ ކަމަށެވެ. އެޗްއައިއެޗް މިހާރު ޓްރެވަލް ސަޕޯޓް ސެންޓަރެއްގެ ގޮތުގައި ހަމަޖެއްސާފައި ވަނީ އެޗްޕީއޭއިން ޓްރެވަލް ރެސްޓްރިކްޝަން ނެގިފަހުން ދިމާވާ ކަންކަމުގައި ބޭނުންކުރެވޭނެ ހޮޓަލެއްގެ ގޮތުގައި ހަމަޖެއްސުމަށް ކަމަށް މަބްރޫކް ވިދާޅުވިއެވެ.
މިހާތަނަށް ރާއްޖެއަށް އައި މީހުންގެ ތެރެއިން ރާއްޖެއިން އނަބުރާ ފޮނުވާލާފައިވަނީ 37 ފަރާތެއް ކަމަށް ކުރިން އެޗްޕީއޭއިން ބުނެފައި ވެއެވެ.
މީގެ އިތުރުން މަބްރޫކް ވިދާޅުވީ ކަރަންޓީން ފެސިލީޓީއެއްގެ ގޮތުގައި ބޭނުން ކުރަމުން އަނަން ވިލިވަރުގެ ދެވަނަ ފިޔަވަހީގެ މަސައްކަތް މާދަމާ ފެށޭނެ ކަމަށެވެ. ހަމައެއާއެކު ވެލިދޫ ރިސޯޓު ކަރަންޓިން ފެސިލިޓީއަކަށް ބަދަލުކުމަށް ކުރާ މަސައްކަތުގެ ތެރެއިން މިހާރު 80 ކޮޓަރި ނިމިފައިވާ ކަމަށް އޭނާ ވިދާޅުވިއެވެ.
މިހާތަނަށް ރާއްޖޭގައި މިބައްޔަށް 13 މީހަކު ވަނީ ޕޮސިޓީވްވެފައެވެ. ވޭތުވެދިޔަ 24 ގަޑިއިރު ތެރޭގައި ޖުމްލަ ތިން ކޭސްއެއް ވަނީ ފެނިފައެވެ. އެއީ އަނަންތަރާ ދިގުރަށުގެ އެއް ކޭސްއާއި އައިލެނޑް ސަފާރީން ދެ ކޭސްއެކެވެ.
ޕޮޒިޓިވް ކޭސްތައް:
- ކުރެއްދޫ އައިލެންޑް ރިސޯޓް: 5
- ކުރަމަތި އަިލެންޑް ރިސޯޓް: 2
- ސޭންޑީސް ބަތަލާ ރިސޯޓް: 2
- އަނަންތަރާ ދިގުރަށް: 2
- އައިލެންޑް ސަފާރީ: 2
މި ބައްޔަށް ޕޮސިޓިވް ވެފައިވާ މީހުން އިތުރަވަމުން ދާ އިރު މި ބަލިން ރައްކާތެރި ވުމުގެ ގޮތުން ސަރުކާރުން އަނަންނީ އެކި ފިޔަވަޅުތައް އަޅާމުންނެވެ. އެގޮތުން ބަލި ޖެހިފައިވާ މީހުން ނުވަތަ މި ބައްޔަށް ޝައްކު ކުރެވޭ ފަރާތްތައް އެކަހެރިކުރުމަށް ހަދަމުންދާ މަރުކަޒުތައް ވަނީ އިތުރުކޮށްފައެވެ. މިހާރު ބޭނުން ކުރަމުންދާ މަރުކަޒުތަކުގެ އިތުރުން ރާއްޖޭގެ ހުރިހާ އަތޮޅުތަކެއްގައި ޖުމްލަ 358 ކަރަންޓީން ފެސިލީޓީ އާއި 283 އައިސޮލޭޝަން ފެސިލީޓީ ވަނީ ހަމަޖައްސާފައެވެ.
