ރާއްޖެއިން އިތުރު ދެމީހަކު ކޮވިޑް-19 އަށް ޕޮޒިޓިވްވެއްޖެއެވެ.
މިކަން ހެލްތް ޕްރޮޓެކްޝަން އެޖެންސީ (އެޗްޕީއޭ) ހާމަކުރީ މިރޭ ކުރި ޓްވީޓަނެވެ. އެ ޓްވީޓުގައި ބުނީ ސޭންޑީސް ބަތަލާ ރިސޯޓުން ކޮވިޑް-19 އަށް ޝައްކު ކުރެވިގެން ޓެސްޓުކުރި ތިން މީހުންގެ ނަތީޖާ ލިބިފައިވާ ކަމަށެވެ.
އެޗްޕީއޭން ބުނީ، މި ތިން މީހުންގެ ތެރެއިން ދެ މީހުން ކޮވިޑް-19 އަށް ޕޮޒިޓިވް ވެފައި ވާއިރު އެކަކު ނެގެޓިވް ވެފައިވާ ކަމަށެވެ. އެ އެޖެންސީން އިތުރަށް ބުނީ މި ހާލަތު ގާތުން މޮނިޓާ ކުރަމުންދާ ކަމަށެވެ.
މިރޭ ޕޮޒިޓިވްވެފައިވާ ދެ މީހުންނަކީ ބިދޭސީން ކަމަށް އެޗްޕީއޭން ބުނެއެވެ.
މިރޭ ދެމީހަކު ކޮވިޑް-19 އަށް ޕޮޒިޓިވްވެފައި ވާއިރު ރޭ ވަނީ ޅ. ކުރެއްދޫ އައިލެންޑް ރިސޯޓުގެ ދެ މުވައްޒަފުން މި ބައްޔަށް ޕޮޒިޓިވްވެ އެކަން އިއުލާނު ކޮށްފައެވެ. އެހެންކަމުން މިހާރު ޖުމްލަ 4 މީހުން މި ވަނީ މި ބައްޔަށް ޕޮޒިޓިވްވެފައެވެ.
