ބާރަށް ފެތުރެމުްނދާ ކޮރޯނާ ވައިރަސްއާ ގުޅިގެން މާދަމާރެއިން ފެށިގެން އިޓަލީ ފަތުރުވެރިން ރާއްޖެ އައުން ހުއްޓާލާނެ ކަމަށް ކޮވިޑް ޓާސްކްފޯސްއިން ބުނެފިއެވެ.
ރާއްޖެއަށް އިޓަލީ މީހުން އައުން ހުއްޓާލަނީ މާދަމާ ރޭ 11:59 އިން ފެށިގެންނެވެ.
މިރޭ ބެއްވި ޕްރެސްކޮންފަރެންސްގައި ޓޫރިޒަމް މިނިސްޓަރު އަލީ ވަހީދު ވިދާޅުވީ، މާދަމާ ރެއިން ފެށިގެން އިޓަލީން ފަތުރުވެރިން ގެނައުން މެދުކަނޑާލާ އިރު ޑައިރެކްޓް އަދި ޓްރާންސިޓް ފްލައިޓްތައް ވެސް މެދުކަނޑާލާނެ ކަމަށެވެ.
އޭނާ އެހެން ވިދާޅުވި އިރު ރާއްޖޭގައި މިވަގުތު އިޓަލީގެ ގިނަ އަދަދެއްގެ ފަތުރުވެރިން އެބަ ތިއްބެވެ. އަދި ހާއްސަކޮށް އިޓަލީގެ ފަތުރުވެރިން އަންނަ ރިސޯޓުތަކުގެ 70 ޕަސެންޓް އޮކިއުޕަންސީ މިހާރުވެސް އޮތްކަން ފާހަގަ ކުރެވެއެވެ.
އިޓަލީއަކީ ޗައިނާ ފިޔަވާ ކޮރޯނާ ވައިރަސް އެންމެ ބާރަށް ފެތުރޭ އެއް ގައުމެވެ. ވައިރަސް ފެނި އިޓަލީއާ ހަމައަށް ދަތުރު ކުރި ފަހުން އެގައުމުން ގިނަ އަދަދެއްގެ ފަތުރުވެރިން ރާއްޖެ އައިސްފައިވެއެވެ.
ރާއްޖެއަށް އަންނަ އިޓަލީގެ ފަތުރުވެރިން އައުން މާދަމާރެއިން ފެށިގެން ހުއްޓުވާއިރު، ރާއްޖޭގެ ރިސޯޓެއްގައި ޗުއްޓީ ހޭދަކުރުމަށްފަހު އެނބުރި ގައުމަށް ދިޔަ ފަތުރުވެރިއަކު އިއްޔެ ވަނީ ކޮވިޑް-19 އަށް ޕޮޒިޓިވް ވެފައެވެ.
