އީރާނުގެ ވެރިރަށް ތެހްރާންއިން ފުރައިގެން ޔޫކްރޭންގެ ކިއޭފްއަށް ދަތުރުފެށިތާ ކުޑަ ވަގުތުކޮޅެއް ފަހުން އީރާނު އަސްކަރިއްޔާއިން މިސައިލް ހަމަލާތަކެއް ދީ، ޔޫކްރޭންގެ ޕަސެންޖާ ޖެޓް ޕީއެސް752 ވައްޓާލި ހާދިސާގެ ތަހުގީގުތައް ކުރިއަށް ގެންދިއުމުގައި ޔޫކްރޭނަށް އެއްބާރުލުން ދީގެން މަސައްކަތްތައް ކުރިއަށް ގެންދިއުމަށް އީރާނުން ފުރަގަސްދީފިއެވެ.
އީރާނުން މިފަދަ ނިންމުމެއް ނިންމާފައިވާ މި ދަނޑިވަޅަކީ، އީރާނު އަސްކަރިއްޔާއަށް 'އޮޅުމެއްގެ ތެރެއިން' ކަމުގައި ވީ ނަމަވެސް މަތިންދާބޯޓަށް މިސައިލް ހަމަލާ 'އަމާޒު ކުރެވުނީ' ކަން އެ ހިނދުން ހިނދަށް އީރާނުގެ ކަމާބެހޭ ފަރާތްތަކުން އެނގުނު ކަމަށް ބުނާ ލިޔެކިއުންތަކެއް ލީކުވެފައިވާ ދަނޑިވަޅެއްގައެވެ.
ޔޫކްރޭންގެ ޓީވީއަކުންވަނީ، ހާދިސާ ހިނގި ވަގުތު ރަންވޭއަށް ޖައްސަންދިޔަ ފްލައިޓެއްގެ ޕައިލެޓަކާ އެއާ ޓްރެފިކް ކޮންޓްރޯލް ޓަވަރާ ދެމެދު ދެކެވިފައިވާ ވާހަކަތަކެއް އާންމުކޮށްފައެވެ. އެ ފުޓޭޖުން އިވެނީ އުޑުމަތިން މިސައިލް ހަމަލާއެއްގެ އަލިފާންގަނޑު ކަހަލަ އަލިފާންގަނޑެއް ފެނުނު ކަމަށް ޕައިލެޓް ބުނާ އަޑެވެ. މި ފުޓޭޖުން އިވެނީ އީރާނުގެ ޕައިލެޓަކު ވާހަކަދައްކާ އަޑެވެ. އަދި އެއީ މިސައިލް ހަމަލާ ބަދަލުކުރާ ވަގުތެއްތޯވެސް އެ ޕައިލެޓް އަހައެވެ. އޭގެ ބަދަލުގައި، އެކަހަލަ އެއްވެސް މައުލޫމާތެއް ޓަވަރަށް ލިބިފައި ނުވާކަމަށް ކޮންޓްރޯލަރު ބުނާ އަޑުވެސް އިވެއެވެ.
އެއާ ވިދިގެން ދެން އިވެނީ ޔޫކްރޭންގެ ފްލައިޓް ޕީއެސް752 އާއި ގުޅުމަށް ޓަވަރުން މަސައްކަތްކުރާ އަޑެވެ. ނަމަވެސް އެ ފަހަރުވެސް އެކަން ކާމިޔާބެއް ނުވެއެވެ. ދެން އިވެނީ، ވަރުގަދަ ގޮވުމަކާއެކު ބޮޑު ހުޅުގަނޑެއް ފެންނުނު ކަމަށް އީރާނުގެ ޕައިލެޓް ބުނި އަޑެވެ.
ޔޫކްރޭންގެ ފްލައިޓް ޕީއެސް752 އަށް އީރާނުގެ އަސްކަރިއްޔާއިން މިސައިލް ހަމަލާ ދިން ވަގުތަކީ، އީރާނު އަސްކަރިއްޔާގެ ނުފޫޒުގަދަ ކޮމާންޑަރު ޖެނެރަލް ގާސިމް ސުލައިމާނީ މަރާލިކަމުގެ ބަދަލު ހިފުމުގެ ގޮތުން، އިރާގުގައި ހުންނަ އެމެރިކާގެ އަސްކަރީ ބޭސްތަކަށް އީރާނުން ހަމަލާތަކެއް ދިނުމަށްފަހު ރައްދު ހަމަލާއެއްގެ ފާރައަށް އޮތް ވަގުތެކެވެ. މިހާދިސާގައި ބޯޓުން ދަތުރުކުރި އެންމެންގެ ފުރާނަ ވަނީ ގެއްލިފައެވެ.
ޔޫކްރޭނުން އާންމުކުރި ފުޓޭޖާ ހަވާލާދީ އެގައުމުގެ ރައީސް ވިދާޅުވީ މިސައިލް ހަމަލާގެ ވާހަކަ އެ ހިނދުން އެހިނދަށް އީރާނުގެ ކަމާބެހޭ ފަރާތްތަކަށް އެނގިފައިވާނެ ކަމަށެވެ.
ޔޫކްރޭންގެ ވާހަކަތައް މިފަދަ ގޮތަކަށް ހުރިއިރު، އީރާނުގެ ފަރާތުން ތަހުގީގު ޓީމުގައި އިސްކޮށް ހަރަކާތްތެރިވާ ހަސަން ރިޒާއީފާރު ވިދާޅުވީ، ކަމާބެހޭ އެއްވެސް ލިޔެކިއުމެއް ދެން ޔޫކްރޭނަށް ފޯރުކޮށްނުދޭނެ ކަމަށެވެ.
ވައިގެ އުދުހުންތަކާ ގުޅިގެން ހިނގާ ހާދިސާތަކުގެ ތަހުގީގުތައް ހިނގާ އާންމު އުސޫލަށް ބަލާއިރު ހާދިސާ ތަހުގީގު ކުރާނީ ބޯޓު ވެއްޓޭ ގައުމަކުންނެވެ. ނަމަވެސް މިކަމުގެ ތެރެއަށް ސިޔާސީ ނުފޫޒުތައް ވަދެ، ބޮޑު ހައިޖާނުގަނޑެއް ހިނގާފަހަރުވެސް އާދެއެވެ.
ރަޝިޔާއާއި ޔޫކްރޭނާއި ދެމެދު ވަރުގަދަ ކޯޅުންގަނޑެއް ހިނގަމުންދިޔައިރު 2014 ވަނަ އަހަރުގެ މެދެއްހާ ހިސާބުގައިވެސް ޔޫކްރައިންގެ ފްލައިޓަކަށް މިސައިލް ހަމަލާއެއް އަމާޒުވެ، ބޯޓުން ދަތުރުކުރި އެންމެންވަނީ މަރުވެފައެވެ. މި ހާދިސާގެ އިލްޒާމުވެސް އެއްގައުމުން ދަނީ އަނެއް ގައުމުގެ ކޮނޑުގައި އަޅުވަމުންނެވެ.
