ކޮރޯނާ ވައިރަހަށް ޝައްކުކުރެވޭ ފަތުރުވެރިޔަކު ކުޑަހުވަދުއަކަށް ނުގެނޭ: ހޮސްޕިޓަލް

ކޮރޯނާ ވައިރަހަށް ޝައްކުކުރެވޭ ފަތުރުވެރިޔަކު ދ. ކުޑަހުވަދޫ ހޮސްޕިޓަލަށް ނުގެންދާ ކަމަށް އެ ހޮސްޕިޓަލުން ބުނެފިއެވެ.

ކުޑަކުވަދޫ ހޮސްޕިޓަލުގެ މެނޭޖަރު 'ދަ ޕްރެސް' އަށް މައުލޫމާތު ދެއްވަމުން ވިދާޅުވީ، ކޮރޯނާ ވައިރަހަށް ޝައްކު ކުރެވޭ ފަތުރުވެރިޔަކު އެ ހޮސްޕިޓަލަށް ގެންދިޔަ ކަމަށް ބުނެ ދެކެވޭ ވާހަކަތަކަކީ ދޮގު ވާހަކަތަކެއް ކަމަށެވެ. ހޮސްޕިޓަލުން ބުނީ، ދ. ވޮއްމުލިން ޗައިނާގެ ފަތުރުވެރިޔަކު އެ ހޮސްޕިޓަލަށް ގެންދިޔަ ކަމަށާއި، ނަމަވެސް ހެލްތް މިނިސްޓްރީގެ ޓާސްކްފޯސްއާ އެކު ބެލިބެލުމުން ޑަބްލިއޯ އެޗްއޯގެ ގައިޑްލައިންގަވާ ކަންތައްތަކަށް ފެތޭ އެއްވެސްކަމެއް އެ ފަތުރުވެރިޔާގެ ފަރާތުން ފެނިފައިވާ ނުވާ ކަމަށެވެ.

އަދި އޭނާގެ ފަރާތުން އެންކޮރޯނާއަށް ޝައްކު ކުރެވޭނެ އެއްވެސް ހާލަތެއް ނެތުމުން މިހާރު އޭނާ ދޫކޮށްލާފައިވާ ކަމަށާއި، ހޮސްޕިޓަލްގެ ކަންކަން އާންމު ހާލަތެއްގައިވާ ކަމަށް ހޮސްޕިޓަލުން މައުލޫމާތުދެއެވެ.

ހޮސްޕިޓަލުން މިހެން ބުނެފައިވާއިރު، ނިޔާމަ ރިސޯޓުން އަދި ވޮއްމުލި ރިސޯޓުން ކޮރޯނާ ވައިރަހަށް ޝައްކު ކުރެވޭ ފަތުރުވެރިޔަކު ކުޑަހުވަދޫއަށް ގެންދިޔަ ކަމުގެ އަޑުތައް ވަނީ ފެތުރިފައެވެ.

މިކަމާ ގުޅިގެން 'ދަ ޕްރެސް' އަށް މައުލޫމާތު ދެމުން ވޮއްމުލި ރިސޯޓުން ވެސް ބުނީ، އެކަހަލަ އެއްވެސް ކަމެއް އެ ރިސޯޓުގައި ހިނގައިގެން ނޫޅޭ ކަމަށެވެ. އަދި މިއަދު އެ ރިސޯޓުން އެއްވެސް ބަޔަކު ކުޑަހުވަދުއަށް ގޮސްފައި ނުވާ ކަމަށް ވެސް އެ ރިސޯޓުން ބުނެއެވެ. ވޮއްމުލި ރިސޯޓުން ޗައިނާ ފަތުރުވެރިޔަކު މިއަދު 12:00 ހާއިރު ކުޑަހުވަދޫއަށް ގެންދިޔަ ކަމަށް ކުޑަހުވަދޫ ހޮސްޕިޓަލުން ބުނާއިރު، ވޮއްމުލި ރިސޯޓުން ދަނީ އެކަން ދޮގުކުރަމުންނެވެ. އެ ރިސޯޓުން ބުނީ ފާއިތުވި 48 ގަޑިއިރު ތެރޭ އެއްވެސް ފަތުރުވެރިޔަކު ކުޑަހުވަދުއަށް ގެންގޮސްފައި ނުވާ ކަމަށެވެ.

'ދަ ޕްރެސް' އަށް މައުލޫމާތު ދެއްވަމުން ނިޔާމަ ރިސޯޓުގެ ޖެނެރަލް މެނާޖަރު ވިދާޅުވީ، ކޮރޯނާ ވައިރަހަށް ޝައްކު ކުރެވޭ ޗައިނާ ފަތުރުވެރިޔަކު ނިޔާމަ ރިސޯޓުން ފެނިގެން ދ. ކުޑަކުވަދޫ ހޮސްޕިޓަލަށް ގެންދިޔަ ކަމަށް ބުނެ ދެކެވޭ ވާހަކަތައް އެފަރާތަށް ވެސް އިވިފައިވާ ކަމަށެވެ. ނަމަވެސް އެއީ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށް އޭނާ ވިދާޅުވިއެވެ.

ނިޔާމަ ރިސޯޓުގެ ޖެނެރަލް މެނޭޖަރު ވިދާޅުވީ، ހުން އައިސްގެން ވެސް އެއްވެސް ފަތުރުވެރިއަކު މިއަދު ކުޑަހުވަދޫއަށް ގޮސްފައި ނުވާ ކަމަށާއި، އަދި އަމުދުން އެއްވެސް ފަތުރުވެރިއެއްގެ ކިބައިން ކޮރޯނާ ވައިރަސްގެ އަލަމާތްތައް ފެނިފައި ނުވާ ކަމަށް އޭނާ ވިދާޅުވިއެވެ.

ރާއްޖެއިން ކޮރޯނާ ވައިރަހަށް ޝައްކު ކުރެވޭ މީހަކު ފެނިއްޖެނަމަ، އެ ކަން އިއުލާނު ކުރާނެ ކަމަށް ވެސް ހެލްތް މިނިސްޓްރީން ވަނީ ބުނެފައެވެ. ޗައިނާގެ އެކި ސަރަޙައްދުތަކުގައި ހަލުވިކަމާއެކު "ނޮވެލް ކޮރޯނާ ވައިރަސް" ފެތުރެން ފެށުމާ ގުޅިގެން، މި ބަލިން ރައްކާތެރިވުމުގެ ގޮތުން ކަމާއިބެހޭ އިދާރާތަކުން އަޅާފައިވާ ބައެއް ފިޔަވަޅުތަކުގެ ތެރޭގައި "ތާމަލް ކެމެރާ" ބޭނުންކޮށްގެން ވެލާނާ އިންޓަނޭޝަނަލް އެއާޕޯޓާއި ގަން އިންޓަނޭޝަނަލް އެއާޕޯޓުން މެދުވެރިކޮށް ރާއްޖެއަށް އެތެރެވާ ހުރިހާ ފަސިންޖަރުން ސްކްރީންކުރުން ހިމެނެއެވެ. އަދި މި ބައްޔަށް ޝައްކު ކުރެވޭ އަދި ބަލީގެ އަލާމާތްތައް ފެންނަ ފަރާތްތަކަށް ރައްކާތެރިކަމާއެކު ފަރުވާދެވޭނެ އިންތިޒާމްތައް ހަމަޖެއްސުން ވެސް ހިމެނެއެވެ.