މަސްތުގެ ހާލަތުގައި ހުރެ، 12 އަހަރުގެ ދަރިފުޅަށް އެކި ފަހަރު މަތިން ޖިންސީ ގޯނާ ކުރި މީހަކަށް މިދިޔަ ބުރާސްފަތި ދުވަހުގެ ރޭ ވިލިމާލޭން ބަޔަކު ނިކުމެ އަނިޔާ ކުރުމަށްފަހު ފުލުހުންނާ ހަވާލު ކުރި މީހާ ހައްޔަރު ނުކުރާ ކަމަށް ފުލުހުން ބުނެއެވެ.
'ދަ ޕްރެސް' އަށް މައުލޫމާތު ދެމުން ފުލުހުން ބުނީ، އެ މައްސަލަ ފުލުހުން ތަހުގީގު ކުރަމުންދާ ކަމަށެވެ. ނަމަވެސް، އެ މައްސަލާގައި އެއްވެސް މީހަކު ހައްޔަރުކޮށްފައި ނުވާ ކަމަށް ފުލުހުން ބުނެއެވެ.
ވިލިމާލެއިން އާންމުންގެ ބަޔަކު ނިކުމެ، އަނިޔާކޮށްފައި ވަނީ މަސްތުގެ ހާލަތުގައި ހުރެ، އަންހެން ދަރިފުޅަށް އެކި ފަހަރު މަތިން ޖިންސީ ގޯނާކޮށް، އާއިލާގެ މެންބަރުން މަރާލާނެ ކަމުގެ އިންޒާރު ދިން މީހަކު ކަމަށް ބުނެއެވެ. އޭނާއަށް ބަޔަކު އަނިޔާ ކޮށްފައި ވަނީ، މަސްތުވެގެން ހުރެ ކުރި އަނިޔާތައް އޭނާގެ 12 އަހަރުގެ ދަރިފުޅު ރޮމުން، ގިސްލަމުން ކިޔައިދޭ އޯޑިއޯއެއް ސޯޝަލް މީޑިއާގައި ލީކްކޮށްލި ފަހުންނެވެ.
މިދިޔަ ބުރާސްފަތި ދުވަހުގެ ރޭ އެ ފިރިހެން މީހާއަށް އަނިޔާކޮށްފައި ވާއިރު، މިކަމާ ގުޅިގެން ފުލުހުން ބުނީ އެރޭ ފުލުހުންނަށް ރިޕޯޓްކޮށްފައި ވަނީ މާރާމާރީއެއްގެ މައްސަލައެއް ކަމަށެވެ.
ނަމަވެސް 'ދަ ޕްރެސް' އަށް މައުލޫމާތު ދިން ފަރާތަކުން ބުނީ، އެރޭ ވިލިމާލޭގައި ފިރިހެން މީހާއަށް އަނިޔާ ކުރުމުން އޭނާ ހޮސްޕިޓަލަށް ވެސް ގެންދަން ޖެހުނު ކަމަށެވެ. އަދި ކުޑަކުއްޖަކާ ބެހުނު ކަމަށް ބުނާ މީހާ ވިލިމާލެ ހޮސްޕިޓަލަށް ގެންގޮސް ފަރުވާ ދެމުންދާތީ އެ ސަރަހައްދަށް އެތައް ބަޔަކު އެއްވެ ހިތްހަމަނުޖެހުން ފާޅު ކޮށް، ހޮސްޕިޓަލުގެ ދޮރުތަކުގެ ބިއްލޫރިތައް ވެސް ވަނީ ތަޅާލާފައެވެ. އެރޭ އެ މީހާ ގޮވައިގެން ފުލުހުން ވަނީ ލޯންޗެއްގައި މާލެއަށް ގޮސްފައި ކަމަށް ވެސް މައުލޫމާތު ދިން ފަރާތުން ބުނެއެވެ.
