އީރާނުގެ ވެރިރަށް ތެހްރާންގައި މިއަދުގެ ހުކުރު ނަމާދު އިމާމުވެ، ކުރައްވާނީ އެގައުމުގެ ރޫހީ ލީޑަރު އާޔަތުﷲ ޢަލި ޚަމާނާއީކަމަށް ޚަބަރު ލިބިއްޖެއެވެ.
މިއީ 2012 ވަނަ އަހަރަށްފަހު ޚަމާނާއީ އިމާމުވެ ހުކުރު ނަމާދުކުރައްވާ ފުރަތަމަ ފަހަރެވެ.
މިދަނޑިވަޅަކީ 180މީހުންނާއެކު ތެހްރާންއިން ފުރައިގެން ޔޫކްރައިންއަށް އުދުހެމުންދިޔަ ކޮމާޝަލް ފްލައިޓް ޕީއެސް752އަށް، އީރާނު އަސްކަރިއްޔާގެ މިސައިލް ހަމަލާތަކެއް އަމާޒުވެ، އެ ބޯޓުން ދަތުރުކުރި އެންމެންގެ ފުރާނަ ގެއްލުނު ހާދިސާއާ ގުޅިގެން އީރާނުގެ އިސް އޮފިޝަލުންނަށް ބޮޑެތި ފާޑުކިއުންތަކެއް އަމާޒުވެ، އެގައުމުގައި ވަރުގަދަ މުޒާހަރާތަކެއް ކުރިއަށް ދާ ދަނޑިވަޅެކެވެ.
މީގެ އިތުރުން އެމެރިކާއިން ކުރިމަތިކުރަމުންދާ ފިއްތުންތަކާއެކު މާލީ އަދި އިގުތިސޯދީ ގޮތުން އިނދަޖެހިފައިވާ އޮތުމުގެ ސަބަބުން އީރާނުގެ ރައްޔިތުން ދަނީ ސަރުކާރާ ދެކޮޅަށް އަޑުއުފުލަމުންވެސް މެއެވެ.
އީރާނުގެ މެހްރު ނިއުސް އޭޖެންސީއިން މައުލޫމާތުދޭ ގޮތުގައި އުމުރުފުޅުން 80 އަހަރުގެ ޚާމަނާއީ މިއަދު އިމާމުވެ ހުކުރުކުރައްވާނީ ތެހްރާންގެ މޫސައްލާ މިސްކިތުގައެވެ. ނަމަވެސް މިއީ މިހާރު އެގައުމުގައި ހިންގަމުންދާ ކަންކަމާ ގުޅިގެން ޚާމަނާއީ ކުރައްވާ ކަމެއް ކަން ނުވަތަ ނޫންކަން އެ އިދާރާއިން ތަފްސީލުކޮށްދީފައެއް ނުވެއެވެ.
ތެހްރާންގައި ޚާމަނާއީ އެންމެ ފަހުން އިމާމުވެ ހުކުރުކުރައްވާފައިވަނީ 2012 ވަނަ އަހަރުއެވެ. އެއީ އީރާނުގެ އިސްލާމީ އިންގިލާބަށް 33 އަހަރު ފުރުމުގެ މުނާސަބާގައެވެ.
