އަސްކަރީ ސިފައިންނަށް ތަމްރީނު ފޯރުކޮށްދިނުމަށް އެމެރިކާގައި ހިންގާ މަރުކަޒުތަކުގައި ތިބި، ސައުދީ އަރަބިއްޔާއަށް ނިސްބަތްވާ 21 ކެޑޭޓަކު އެ މަރުކަޒުތަކުން ބޭރުކޮށްފިއެވެ.
އެމެރިކާގައި ހިންގާ އަސްކަރީ މަރުކަޒުތަކުގައި ތިބި ސައުދީގެ އަސްކަރީ ކެޑޭޓުން އެ މަރުކަޒުތަކުން ބޭރުކޮށްފައިވަނީ، ޕެންސަކޯލާ ނޭވަލް އެއާ ސްޓޭޝަންގައި ތަމްރީނު ހަދަމުންދިޔަ ސައުދީގެ އަސްކަރީ ކެޑޭޓަކު ބަޑީގެ ހަމަލާތަކެއް ދީ 3 މީހަކު މަރާލި ހާދިސާއާ ގުޅިގެންނެވެ.
ޑިސެމްބަރު 6 ވަނަ ދުވަހުގެ ހަމަލާއާއި ގުޅިގެން އެމެރިކާއިންވަނީ އެގައުމުގައި ސައުދީގެ އަސްކަރީ ކެޑޭޓުން ތަމްރީނު ކުރުމަށް ހިންގަމުންދިޔަ މަޝްރޫއުވެސް މަޑުޖައްސާލާފައެވެ.
އެމެރިކާގެ އަސްކަރީ މަރުކަޒުތަކުން ބޭރުކޮށްފައިވާ ސައުދީގެ އަސްކަރީ ކެޑޭޓުންނަކީ އެއްވެސް ހާލެއްގައި، ޕެންސަކޯލާ ބޭސްއަށް ހަމަލާދިން ސައުދީ އެއާފޯސްގެ 21 އަހަރުގެ ލެފްޓިނެންޓްއަށް އެހީތެރިވިބައެއް ނޫންކަން އެމެރިކާއިން ވަނީ ފާހަގަކޮށްފައެވެ.
ނަމަވެސް އެމެރިކާގެ އެޓާނީ ޖެނެރަލް ވިލިއަމް ބާ ވިދާޅުވީ، މި ކެޑޭޓުންގެ ފޯނުންވެސް 'ޖިހާދީ' ފިކުރުގެ މައުލޫމާތު ފެނިފައިވާކަމަށާ، އޭގެ އިތުރުން، އުމުރާ އެކަށީގެން ނުވާ ހާލަތްތަކެއްގައި ތިބި ކުޑަކުދިންތަކެއްގެ ފޮޓޯޓަކެއްވެސް އެ ކެޑޭޓުންގެ ފޯނުތަކުން ފެނިފައިވާކަމަށެވެ. ތަމްރީނު މަރުކަޒު ބޭރުކުރި 21 ކެޑޭޓުންގެ ތެރެއިން 17 މީހެއްގެ ފޯނުން، ޓެރަރިޒަމްއާއި ގުޅުންހުރި މައުލޫމާތުވެސް ފެނިފައިވާކަމަށް އެމެރިކާއިން ބުނެއެވެ.
އަސްކަރީ ތަމްރީނު ފޯރުކޮށްދޭ މަރުކަޒުތަކުން ބޭރުކުރި ސައުދީގެ ކެޑޭޓުން މިހާރު ވަނީ އަނބުރާ، ސައުދީ އަރަބިއްޔާއަށް ފޮނުވާލާފައެވެ. އެމީހުންނާ މެދު އެމެރިކާއިން އެއްވެސް ދައުވާއެއް އުފުލުފާއި ނުވި ނަމަވެސް، ސައުދީގައި އެފަދަ ކަމެއް ވުން އެކަށީގެންވާކަމަށް ޚަބަރު ލިބެއެވެ.
އެމެރިކާގައި ތަމްރީނު ފުރިހަމަ ކުރަމުންދިޔަ ސައުދީ އަސްކަރިއްޔާގެ 21 ކެޑޭޓަކު ތަމްރީނު ޕްރޮގްރާމްތަކުން ވަކިކޮށް، އަނބުރާ ގައުމަށް ފޮނުވާލި ނަމަވެސް، ސައުދީ އަސްކަރިއްޔާއަށް ނިސްބަތްވާ 800 އަށްވުރެ ގިނަ ކެޑޭޓް ސިފައިން މިހާރުވެސް ދަނީ އެމެރިކާގައި ތަމްރީނު ހާސިލުކުރަމުންނެވެ.
