ބަންގްލަދޭޝް މީހެއްގެ އަތުން ފައިސާއާއި ވޯކް ޕާމިޓް ފޭރެން އުޅުނު ފުލުހަކު ހައްޔަރުކޮށްފި އެވެ.
ފުލުހުންގެ މީޑިއާ އޮފިޝަލް މައުލޫމަތުދޭ ގޮތުގައި، މިމަހުގެ 12 ވަނަ ދުވަހު ފުލުހުން ހިންގި ހާއްސަ އޮޕަރޭޝަނެއްގައި ބަންގްލަދޭޝް ރައްޔިތެއްގެ އަތުން ފައިސާއާއި އޭނާގެ ވޯކް ޕާމިޓް ފޭރެން އުޅުނު ކަމުގެ ތުހުމަތުގައި އެދުވަހު 18:45 ހާއިރު 2 މީހަކު ފުލުހުން ހައްޔަރުކޮށްފައިވާ ކަމަށެވެ.
ފުލުހުން ބުނީ މި މައްސަލާގައި ހައްޔަރުކޮށްފައިވަނީ އުމުރުން 26 އަހަރުގެ ދިވެހި ފިރިހެނަކާއި، އުމުރުން 28 އަހަރުގެ ބަންގްލަދޭޝް ފިރިހެނެއް ކަމަށެވެ. އަދި ހައްޔަރުކޮށްފައިވާ ދިވެހި ފިރިހެން މީހާއަކީ ފުލުހުންގެ ވަޒީފާގައި ޕޮލިސް ލާންސް ކޯޕްރަލް އެއްގެ މަގާމުގައި މަސައްކަތް ކުރަމުންދާ މީހެއް ކަމަށް ފުލުހުން ބުނެއެވެ.
ފުލުހުން ބުނީ އޭނާ ވަނީ ފުލުހުންގެ ވަޒީފާގެ މަސްއޫލިއްޔަތުން ދުރުކޮށްފަކަމަށާއި، އަދި އޭނާގެ މައްސަލަ ފުލުހުންގެ ޕްރޮފެޝަނަލް ސްޓޭންޑާޑްސް ކޮމާންޑުންދަނީ ތަހުގީގުކުރަމުން ކަމަށެވެ. ހައްޔަރު ކުރެވުނު ބަންގްލަދޭޝް މީހާއަކީ، އިމިގްރޭޝަނުގެ ގާނޫނާއި ހިލާފަށް ރާއްޖޭގަިއ ދިރިއުޅޭ މީހެއްކަމަށްވެސް ފުލުހުން ބުނެއެވެ.
މި މައްސަލައިގެ ޖިނާއީ ތަހުގީގުވެސް ކުރިއަށް ގެންދާ ކަމަށް ފުލުހުން ބުނެއެވެ.
