ގަވާއިދާ ހިލާފަށް ޕާކް ކޮށްގެން ޖަހާ، ޕާކިން ވައެލޭޝަން ސްޓިކާ ޖަހައިގެން ދައުލަތަށް އާމްދަނީ ހޯދުމާމެދު އިސްދޫ ދާއިރާގެ މެންބަރު އަލީ ހަމީދު ކަންބޮޑުވުން ފާޅުކުރައްވައިފިއެވެ.
އަލީ ހަމީދު ވިދާޅުވީ، ސްޓިކާ ޖަހައިގެން ބަޖެޓަށް ފައިސާ ހޯދުމަކީ ބަޖެޓު ކުރެވިފައިވާ އާމްދަނީ އެއް ނަމަ، ސަރުކާރުން ވަނީ ރައްޔިތުންނަށް ވަރަށް ބޮޑުތަނުން ބޭއިންސާފުވެފައި ކަމަށެވެ.
ހަމީދު ވަނީ ބަޖެޓަށް ފައިސާ ހޯދުމަށް ރައްޔިތުންގެ ޖީބު ހުސްކުރުން ނޫން ގޮތެއް ހޯދަން ޖެހޭ ކަމަށް ވިދާޅުވެފައެވެ. އަދި އެފަދަ ގޮތެއް ހޯދުމަށް ފިނޭންސް މިނިސްޓަރު އިބްރާހިމް އަމީރާއި، އިކޮނޮމިކް މިނިސްޓަރު ފައްޔާޒް އިސްމާއިލްގެ އިތުރުން ކޮމިޝަނާ އޮފް ޕޮލިސް މުހައްމަދު ހަމީދަށް އޭނާ ވަނީ ގޮވާލައްވާފައެވެ.
ހަމީދު މިފަދައިން ވިދާޅުވެފައި މިވަނީ، ނިމިގެން ދިޔަ 2019 ވަނަ އަހަރު ގަވާއިދާ ހިލާފަށް ޕާކް ކުރުމުގެ ސަބަބުން 36963 ޕާކިން ވައެލޭޝަން ސްޓިކާ ޖަހާފައި ވަނިކޮށެވެ. ސްޓިކާގެ މައްސަލައާ ގުޅިގެން ފުލުހުންނާއި ސަރުކާރަށް ދަނީ އާންމުންގެ ފާޑުކިއުން އަމާޒުވެފައެވެ.
މި ސަރުކާރުން ޕާކް ކުރާނެ ޖާގަ ނުދައްކާ ސްޓިކާ ނުޖަހާނެ ކަމަށް ވިދާޅުވެ، 36963 ސްޓިިކާ ޖަހާފައި ވާއިރު، ބައެއް ފަރާތްތަކުން ދަނީ ސްޓިކާ ޖެހުމަކީ އިގްތިސޯދުގެ "މައި ލޭ ނާރު" ކަމުގައި ސިފަކުރަމުންނެވެ.
