ގދ. މަޑަވެލި ގެއެއްގައި އަލިފާން ރޯވެ، އެގޭގެ 80 ޕަސެންޓް އަނދާފައިވާ ކަމަށާއި އެހާދިސާގައި އެއްވެސް މީހަކަށް އަނިޔާއެއް ލިބިފައިނުވާ ކަމަށް އެމްއެންޑީއެފުން މިއަދު ބުނެފިއެވެ.
އެމްއެންޑީއެފުން ބުނީ މަޑަވެލި ނާރެސް ގޭގައި ރޯވި ކަމުގެ ރިޕޯޓް ލިބިފައިވަނީ މިއަދު ހެނދުނު 08:20 ހާއިރު ކަމަށާއި ރިޕޯޓް ލިބުމާއެކު ތިނަދޫ ފަޔާ ސްޓޭޝަންގެ ފަޔާމެނުން ފުރައިގެން މަޑަވެއްޔަށް މިއަދު ހެނދުނު 08:47 ހާއިރު ގޮސްފައިވާ ކަމަށެވެ. އެރަށަށް ފަޔާމެނުން ދިޔައިރު، ރަށުގެ ރައްޔިތުން އެގޭގައި ރޯވި އަލިފާން ގަނޑު ނިއްވާލާފައިވާ ކަމަށެވެ.
ހާދިސާގައި އެއްވެސް މީހަކަށް އަނިޔާ ލިބިފައިނުވާ ކަމަށާއި ނަމަވެސް ގޭގެ 80 ޕަސެންޓް އަނދާފައިވާ ކަމަށެވެ. އެ ގެއަކީ ހަ ކޮޓަރި ހުރި ގެއެކެވެ. އެގޭގެ ހަތަރު ކޮޓަރިއެއް އެއްކޮށް އަނދާފައިވާ ކަމަށާއި ދެ ކޮޓަރިއަށް ދުމުގެ އަސަރުކޮށްފައިވާ ކަމަށްވެސް އެމްއެންޑީއެފުން ބުންޏެވެ.
