ރާއްޖެ ތަރައްގީކޮށް ކުރިޔަށް ދެވޭނީ ޒުވާނުން ބާރުވެރިކޮށްގެން ކަމަށް ކަމަށް ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ޔޫތު މިނިސްޓްރީން ރޭ ބޭއްވި "ރަން އަހަރު" ޖަލްސާގައި ވާހަކަފުޅު ދައްކަވަމުން ފައިސަލް ވިދާޅުވީ މި ސަރުކާރުން އެންމެ ފުރަތަމަ ފެށި އެއް މަސައްކަތަކީ ޒުވާނުން ބާރުވެރިކުރުމާއި ތަރައްގީގެ ކަންކަމުގައި ޒުވާނުން ބައިވެރިކުރުމުގެ މަސައްކަތްކަމުގައި ކަމަށެވެ.
"މި ސަރުކާރު ފެށިގެން އައީވެސް ހަށިހެއު ދުޅަހެއު އީދުގެ ނަމުގައި ފެށިގެން ދިޔަ ޕްރޮގްރާމަކުން، ކުޅިވަރު ކުރިއެރުވުމަށް މި ސަރުކާރުން ވަރަށްބޮޑު އިސްކަމެއް ދެއްވާ،" ނައިބް ރައީސް ވިދާޅުވިއެވެ.
މިދިޔަ އަހަރު ކުޅިވަރުގެ ދާއިރާއިން ރާއްޖެއަށް ލިބުނު ކާމިޔާބީތަކުގެ މައްޗައް އަލިއަޅުވާލައްވަމުން އެމަނިކުފާނު ވިދާޅުވީ 2023 ވަނަ އަހަރު ރާއްޖޭގައި އިންޑިއަން އޯޝަން އައިލެންޑް ގޭމްސް ބާއްވާ ގޮތަށް ހަމަޖެހުމަކީ އުފާކުރަންޖެހޭ ވަރު ކާމިޔާބީއެއް ކަމަށްވެސް ނައިބް ރައީސް ވިދާޅުވިއެވެ.
ނައިބް ރައީސް ވިދާޅުވީ ވޭތުވެދިޔަ އަހަރަކީ ޒުވާނުންނަށް އަމާޒުކޮށްގެން ކުޅިވަރުގެ އެކިއެކި މުބާރާތްތަކާއި ހޭލުންތެރިކުމުގެ އެކި ޕްރޮގްރާމްތަކާއި ލީޑަރޝިޕްގެ ދާއިރާއިން ގިނަ ޕްރޮގްރާމްތަކެއް ސަރުކާރުން ކުރިޔަށްގެން ދިޔަ އަހަރެއް ކަމަށެވެ. އެގޮތުން ސްކޫލުތަކުގައިވެސް ކުޅިވަރުގެ ގިނަ ހަރަކާތްތަކެއް ކުރިޔަށްގެން ދާކަމުގައި ނައިބު ރައީސް ވިދާޅުވިއެވެ.
ފައިސަލް ވިދާޅުވީ މުޖްތަމައުގައި ހިނގާކަންކަމަށް ވިސްނާ، އެކަކު އަނެކަކަށް އަޅާލާ އޯގާތެރި ބަޔަކަށް ވުމަށާއި ސިއްހަތަށް ގެއްލުންހުރި ކަންކަމާ ދުރުހެލިވާން ޒުވާނުންޖެހޭ ކަމަށެވެ.
