ފަރަށް އެރި ދޯންޏަކުން މީހަކު ގެއްލިގެން އޭނާ ހޯދުގެ މަސައްކަތް އެމްއެންޑީއެފް ކޯސްޓްގާޑުން ފަށައިފިއެވެ.
އެމްއެންޑީއެފްއިން ބުނީ، 3 މީހުންނާއެކު މުދާ އުފުލާ "ޓީޓީއެސް ފާން" ދޯނި ނަމަކަށް ކިޔާ ބޯޓު، ކ.ކަގި ކައިރިއަށް ފަރަށް އެރި ކަމުގެ ރިޕޯޓު ލިބިފައިވަނީ މިއަދު ހެނދުނު 8:09 ހާއިރު ކަމަށެވެ. މި ހާދިސާ ހިނގި އިރު ދޯނީގައި 3 މީހަކު ތިބި ކަމަށާއި، އޭގެތެރޭގައި ހިމެނެނީ 2 ބިދޭސީއަކާއި 1 ދިވެއްސެއް ކަމަށް އެމްއެންޑީއެފުން ބުނެއެވެ.
އެމްއެންޑީއެފްއިން ބުނީ މި ހާދިސާގައި ގެއްލިފައިވަނީ ދޯނީގެ ކެޕްޓަން ކަމަށެވެ. އަދި އޭނާ އަކީ ދޯނީގައި އިން އުމުރުން 37 އަހަރުގެ ދިވެހި މީހާކަމަށްވެސް އެމްއެންޑީއެފުން ބުންޏެވެ. ގެއްލުނު މީހާގެ ފޯނާއި ދަބަސްވެސް ދޯނީގައި އޮތް ކަމަށް އެމްއެންޑީއެފް އިން ބުނެއެވެ.
އެމްއެންޑީއެފުން ބުނީ މިކަން އިތުރަށް ބަލަމުންދާ ކަމަށާއި، މި ކަމުގައި ކޯސްޓް ގާޑް ލޯންޗް އެފްއައިސީ ވެލާނާ ދަނީ ހަރަކާތްތެރި ވަމުން ކަމަށެވެ.
