ވެލާނާ އިންޓަނޭޝަނަލް އެއާޕޯޓް ބޭނުން ކުރާ ފަރާތްތަކުން، ފުރުމުގެ ތިން ގަޑިއިރު ކުރިން އެއާޕޯޓަށް ދިއުމަށް އެ އެއާޕޯޓުން އެދިއްޖެއެވެ.
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މިއަދު ކުރި ޓްވީޓެއްގައި ބުނީ، ފުރުމުގެ ތިން ގަޑިއިރު ކުރިން އެއާޕޯޓަށް ދިއުމަށް އެދިފައި ވަނީ ވީއައިއޭ އިން ދަތިކުރާ ފަރާތްތަކަށް ފަސޭހައަކަށް ކަމަށެވެ.
އެމްއޭސީއެލުން ބުނީ، މި ދުވަސްކޮޅަކީ އެއާޕޯޓުގެ ޑިޕާޗާއަށް ވަރަށް ބާރުބޮޑު ދުވަސްކޮޅެއް ކަމަށެވެ. މި ދުވަސްވަރު ވީއައިއޭއަށް ބާރުބޮޑުވެފައި ވަނީ ޗުއްޓީއާ، ޓުއަރިޒަމް ސީޒަން ދިމާވާތީއެވެ.
ޗުއްޓީ ދުވަސްވަރާ ދިމާކޮށް އެއާޕޯޓަށް ބާރު ބޮޑުވާނެތީ އެމްއޭސީއެލުން ވަނީ މީގެކުރިން ވެސް ވަގުތު އޮތްވާ އެއާޕޯޓަށް ދިއުމަށް އިލްތިމާސްކޮށްފައެވެ. އެގޮތުން، އެމްއޭސީއެލުން މީގެ ކުރިން ބުނީ، އިންޓަނޭޝަނަލް ދަތުރުތަކުގައި ފުރާ ފަރާތްތަކުން ފުރުމުގެ ތިން ގަޑިއިރު ކުރިން އެއާޕޯޓަށް ދިއުމަށާއި ޑޮމެސްޓިކް ދަތުރުތަކުގައި ފުރާ ފަރާތްތަކުން ފުރުމުގެ ދެގަޑިއިރު ކުރިން އެއާޕޯޓަށް ދިއުމަށެވެ.
ޗުއްޓީއާ ދިމާކޮށް ވީއައިއޭ އަށް ބާރުބޮޑުވެފައިވާއިރު، މި ދުވަސްވަރާ ދިމާކޮށް ވީއައިއޭގެ އެއާޕޯޓުގެ އެއާކްރާފްޓް މޫވްމަންޓް ރިކޯޑް ވަނީ އާ ކޮށްފައެވެ. އެގޮތުން، ފްލައިޓް މޫވްމެންޓް 239 އަށް އަރާފައިވާ ކަމަށް އެމްއޭސީއެލުން ބުނެއެވެ.
