އާ ފަނޑިޔާރުންނާ އެކު ސުޕްރީމް ކޯޓުގެ އަޑުއެހުންތައް މާދަމާ ފަށަން ތާވަލްކޮށްފިއެވެ.
ސުޕްރީމް ކޯޓަށް އާ ފަނޑިޔާރުންގެ ގޮތުގައި އުއްތަމަ ފަނޑިޔާރު މުއުތަސިމް އަދުނާނު އަދި ފަނޑިޔާރު ހުސްނުއްސުއޫދު އައްޔަންކުރީ މިދިޔަ ޑިސެމްބަރު މަހުގެ އަށް ވަނަ ދުވަހެވެ. އެއަށް ފަހު ރިސެސްގައި އޮތް ސުޕްރީމް ކޯޓުގައި މާދަމާ ޝަރީއަތް ކުރިއަށް ގެންދިއުމަށް ވަނީ ތާވަލްކޮށްފައެވެ. އެގޮތުން މާދަމާއަށް ތިން މައްސަލައެއްގެ އަޑުއެހުން ބޭއްވުމަށް ވަނީ ތާވަލުކޮށްފައެވެ.
މާދަމާ އަށް ތިން މައްސަލައެއް ތާވަލުކޮށްފައިވާ އިރު، ފެށޭ ހަފްތާއަށް ވެސް ގިނަ މައްސަލަތަކެއް ވަނީ ތާވަލުކޮށްފައެވެ. އޭގެތެރޭގައި ސުޕްރީމް ކޯޓަށް ހުށަހަޅައި ގިނަ ދުވަސްތަކެއް ވެފައިވާ މައްސަލަތައްވެސް ހިމެނެއެވެ. މީގެ 10 އަހަރު ކުރީގެ މައްސަލަތަކެއް ވެސް ވަނީ ތާވަލުކޮށްފައެވެ.
އެއް ހަފްތާ ތެރޭގައި ގިނަ މައްސަލަތަކެއް ބަލަން ތާވަލުކުރި މިއީ ފުރަތަމަ ފަހަރެވެ. މީގެ ކުރިން ސުޕްރީމް ކޯޓުގެ މައްސަލަަތއް ބަލާލެއް ލަސް ވުމުން ގިނަ ބަޔަކު ވަނީ ސުޕްރީމް ކޯޓަށް ވަރަށް ފާޑުކިޔާފައެވެ.
ސުޕްރީމް ކޯޓު ރިސެސްއަށް ގޮސްފައި ވަނީ މިދިޔަ ނޮވެމްބަރު މަހުގެ 28 ވަނަ ދުވަހުއެވެ. ނަމަވެސް އޭރު ސުޕްރީމް ކޯޓުގެ ފަނޑިޔާރުގެ މަގާމުގައި ހުންނެވި ދެ ފަނޑިޔާރުން ވަނީ ފަނޑިޔާރުކަމުން ވަކި ކޮށްފައެވެ. ފަނޑިޔާރު ކަމުން ވަކި ކުރި ދެ ފަނޑިޔާރުންނަކީ އުއްތަމަ ފަނޑިޔާރު ކަމުގައި ހުންނެވި ޑރ. އަހްމަދު އަބްދުﷲ ދީދީ އާއި ފަނޑިޔާރު ކަމުގައި ހުންނެވި އާދަމް މުހައްމަދު އަބްދުﷲ އެވެ.
