ބްރިޖުމަތީގައި މަޑުކޮށްގެން ކުރި ސައިކަލެއް ނައްޓާލަން އުޅުމުގެ ތެރޭގައި އެކްސިޑެންޓް ވެއްޖެއެވެ.
މިކަމާ ގުޅިގެން ފުލުހުން ބުނީ، މިއަދު ހަވީރު 4:38 ހާއިރު މާލެ އިން ހުޅުމާލެއަށް ދާން ދިޔަ ދެ ސައިކަލެއް ޖެހި އެކްސިޑެންޓެއް ހިނގާފައިވާ ކަމުގެ މައުލޫމާތު ފުލުހުންނަށް ލިބިފައިވާ ކަމަށެވެ.
ފުލުހުން ބުނީ، މި އެކްސިޑެންޓް ހިނގަން މެދުވެރިވީ ބްރިޖްގެ އެއް ފަރާތުގައި އެއް ސައިކަލު މަޑުކޮށްފައި، ނައްޓާލަން އުޅުނު ވަގުތު ފަހަތުން އައި ސައިކަލެއްގައި ޖެހިގެން ކަމަށެވެ.
މި އެކްސިޑެންޓުގައި ފަހަތުން އައި ސައިކަލު ދުއްވަން އިނީ އުމުރުން 26 އަހަރުގެ ދިވެހި ފިރިހެނަކު ކަމަށާއި، މަޑުކޮށްގެން އިން ސައިކަު ދުއްވަން އިނީ 30 އަހަރުގެ ދިވެހި އަންހެނެއް ކަމަށް ފުލުހުން މައުލޫމާތުދެއެވެ. މި އެކްސިޑެންޓުގައި ދެ ސައިކަލު ދުއްވި ދެ މީހުންނަށް ވެސް އެކިވަރުގެ އަނިޔާ ލިބިގެން ހުޅުމާލެ ހޮސްޕިޓަލަށް ވަނީ ގެންގޮސްފައެވެ. އަދި އެކްސިޑެންޓުވި ދެ ސައިކަލަށް ވެސް ވަނީ އެކިވަރުގެ ގެއްލުން ލިބިފައި ކަމަށް ފުލުހުން ބުނެއެވެ.
މި އެކްސިޑެންޓުގައި ދެ ސައިކަލުގައި ތިބި ދެ މީހުން އަތުގައި ވެސް ލައިސެންސް އޮންނަ ކަމަށް ފުލުހުން މައުލޫމާތުދޭއިރު، ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
ބްރިޖުގެ އެއް ފަރާތުގައި މަޑުކޮށްގެން ހުރި ސައިކަލެއް ނައްޓާލަން އުޅުމުގެ ތެރޭގައި އެކްސިޑެންޓެއް ހިނގާފައިވާއިރު، ބްރިޖާއި ހައިވޭ އަކީ ވެހިކަލްތައް މަޑުކޮށްގެން އޮތުން މަނާ ސަރަހައްދެކެވެ. މި ސަރަހައްދުގައި ވެހިކަލްތައް މަޑުކޮށްގެން އޮތުމުގެ ސަބަބުން އެކްސިޑެންޓްތައް ހިނގަން މަގުފައިވާއިރު، އިއްޔެ ވެސް މިފަދަ އެކްސިޑެންޓެއް ހިނގާފައިވާ ކަމަށް ފުލުހުން ބުނެއެވެ.
ފުލުހުން ވަނީ، ބްރިޖާއި ހައިވޭ ބޭނުން ކުރާއިރު، ހެދިފައިވާ ގާނޫނާއި ގަވާއިދުތަކަށް އިހްތިރާމް ކުރުމަށް ހުރިހާ ރައްޔިތުންނަށް އިލްތިމާސްކޮށްފައެވެ.
