ވިލިމާލެއިން ވަގަށް ނެގި ދެ ލެޕްޓޮޕް ވިއްކާލާފައި ވަނިކޮށް ހޯދާ، ވައްކަން ކުރި މީހާ ހައްޔަރުކޮށްފިއެވެ.
މިކަމާ ގުޅިގެން ފުލުހުން ބުނީ، ވިލިމާލޭގައި ހުންނަ "އަލް ހަބުޝީ އިންޖީނިއަރިން ކޮންސަލްޓެންޓް" ގެ އޮފީސް ފަޅާލައި ދެ ލެޕްޓޮޕް ވަގަށް ނަގާފައިވާ މައްސަލަ މިދިޔަ ހޮނިހިރު ދުވަހު ފުލުހުންނަށް ހުށަހަޅާފައިވާ ކަމަށެވެ.
ފުލުހުން ބުނީ، މި މައްސަލަ ފުލުހުންނަށް ހުށަހެޅުމާއި އެކު މާލެއާ ވިލިމާލޭގެ އެކި ސަރަހައްދުތަކުން ނެގުނު ސީސީޓީވީ ފޫޓޭޖުތައް ބަލާފައިވާ ކަމަށެވެ. އަދި ސީސީޓީވީ ފޫޓޭޖުތައް ބަލައިގެން ކުރެވުނު މަސައްކަތުން ތުހުމަތު ކުރެވޭ މީހާ ދެނެގަނެ، އެމީހާ ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ. ފުލުހުން ބުނީ، ހައްޔަރު ކުރި މީހާގެ އަތުން ވަގަށް ނަގާފައިވާ ދެ ލެޕްޓޮޕް މިއަދުގެ ވަގުތެއްގައި ހޯދާފައިވާ ކަމަށެވެ.
މި މައްސަލާގައި ވަގަށް ނަގާފައިވާ ދެ ލެޕްޓޮޕް ހޯދާފައިވާ ތަފާތި ދެ މީހަކަށް ވިއްކާފައި ވަނިކޮށް ކަމަށް ފުލުހުން ބުނެއެވެ. މި މައްސަލާގައި ފުލުހުންގެ ބެލުމުގެ ދަށަށް ގެންގޮސްފައި ވަނީ އުމުރުން 49 އަހަރުގެ ދިވެހި ފިރިހެނަކު ކަމަށް ފުލުހުން މައުލޫމާތުދެއެވެ.
ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
