ގަވާއިދާ ހިލާފަށް މުދާ އުފުލަނިކޮށް އެކަން ހުއްތުވަން އުޅުނު ފުލުހަކަށް ހަމަލާދިން މައްސަލާގައި ދިވެއްސަކު ހައްޔަރުކޮށްފިއެވެ.
މިކަމާ ގުޅިގެން ފުލުހުން ބުނީ މިއަދު ހެނދުނު 10:49 ހައިރު މާލެތެރެ ޕެޓްރޯލް ކުރަމުން ދަނިކޮށް، ޗާންދަނީ މަގު ފިހާރައެއް ކުރިމަތިން ސައިކަލެއްގައި ގަވާއިދާއި ހިލާފަށް މުދާ އުފުލައިގެން ދިޔަ މީހަކު މަޑު ކުރުމަށް ބުނެފައިވާ ކަމަށެވެ. ނަމަވެސް، އޭނާ މަޑުނުކޮށް ދާން އުޅުމުން ފުލުހުން ވަނީ އެ ސައިކަލު ހުއްޓުވާފައެވެ.
މި ސައިކަލު ހުއްޓުވާ، ސައިކަލު ދުއްވަން އިން މީހާގެ މައުލޫމާތުދޭން ބުނުމުން، އޭނާ އެކަމާ އިންކާރުކޮށް ފުލުސް މީހާއަށް ހަޑި ހުތުރު ބަހުން މުއާމަލާތް ކޮށްފައިވާ ކަމަށް ފުލުހުން ބުނެއެވެ. ފުލުހުން ބުނީ، ހަޑިހުތުރު ބަހުން މުއާމަލާތް ކުރުމަށްފަހު އޭނާ ވަނީ ފުލުސް މީހާގެ ގައިގައި ސައިކަލުން ޖެއްސުމަށް ފަހު ފިލަން ދާން މަސައްކަތް ކޮށްފައި ކަމަށެވެ.
ފުލުުހުން ބުނީ، ފުލުހުންގެ ވާޖިބަށް ހުރަސް އަޅާ، އަދި ފުލުހަކަށް ހަމަލާ ދިން މައްސަލާގައި 34 އަހަރުގެ ދިވެހި ފިރިހެނަކު ހައްޔަރު ކޮށްފައިވާ ކަމަށެވެ. އަދި އޭނާ ގަވާއިދާ ހިލާފަށް މުދާ އުފުލި މައްސަލާގައި އޭނާގެ ލައިސެންސް ހިފަހައްޓާފައިވާ ކަމަށް ފުލުހުން ބުނެއެވެ.
ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
