ފުވައްމުލަކުގައި އެކްސިޑެންޓެއްގައި ދެމީހަކަށް އަނިޔާވެއްޖެއެވެ. ނަމަވެސް، އެ ދެ މީހުންގެ ހާލު ސީރިއަސް ނޫން ކަމަށް އެރަށު ހޮސްޕިޓަލުން މައުލޫމާތުދެއެވެ.
'ދަ ޕްރެސް' އަށް މައުލޫމާތު ދެއްވަމުން ފުވައްމުލަކު ހޮސްޕިޓަލު ހިންގުމާއި ހަވާލުވެ ހުންނެވި އިބްރާހިމް މުހައްމަދު ވިދާޅުވީ އެރަށުގައި ހިނގި އެކްސިޑެންޓެއްގައި ދެ މީހަކަށް އަނިޔާވެގެން އެ ހޮސްޕިޓަލުން ފަރުވާ ދެމުންދާ ކަމަށެވެ. އަދި އެކްސިޑެންޓް ވެފައިވަނީ އަންހެން ކުއްޖަކާއި ފިރިހެން ކުއްޖަކު ކަމަށާއި، އެ ދެ މީހުންގެ ހާލު ވެސް ރަނގަޅު ކަމަށް އޭނާ ވިދާޅުވެއެވެ.
އިބްރާހިމް ވިދާޅުވީ، އެކްސިޑެންޓް ހިނގާފައިވަނީ ސައިކަލު ކައްސާލައިގެން ކަމަށާއި، މި އެކްސިޑެންޓުގައި ދެ މީހުންގެ ވެސް ގައިގެ އެކި ތަންތަނުން މަށައިގެން ގޮސްފައިވާ ކަމަށެވެ. އަދި އެ ދެ މީހުންނަށް ބޭރުފުށުން މާބޮޑު އަނިޔާއެއް ވެފައި ނުވާއިރު، އެތެރެ ހަށީގައި އިތުރު އަނިޔާއެއް ވޭތޯ ބެލުމަށް މިހާރު އެކްސްރޭތައް ހަދަމުންދާ ކަމަށް އިބްރާހިމް ވިދާޅުވިއެވެ.
މި އެކްސިޑެންޓް ހިނގާފައިވަނީ ފުވައްމުލަކު ލިންކު ރޯޑުން އެރަށު ތުނޑި އަށް ދެވެން އޮންނަ މަގުގެ ކޮޅާއި ހިސާބުން ކަމަށް މައުލޫމާތު ލިބެއެވެ.
މިކަމާ ގުޅިގެން ފުލުހުން ބުނީ، މިރޭ 8:24 ހާއިރު ފުވައްމުލަކު ގެތްމިސްކިތާއި ދިމާލަށް ނައިބުތުއްތު މަގުން ބާރަށް ދުއްވާފައި ދިޔަ ސައިކަލެއް ކޮންޓްރޯލް ނުކުރެވިގެން އެކްސިޑެންޓެއް ހިނގާފައިވާ ކަމަށެވެ. މި އެކްސިޑެންޓުގައި އަނިޔާވެފައިވަނީ އުމުރުން 37 އަހަރުގެ ފިރިހެނަކާއި 19 އަހަރުގެ އަންހެނަކަށް ކަމަށް ފުލުހުން މައުލޫމާތުދެއެވެ.
ފުލުހުން ބުނީ މި އެކްސިޑެންޓުގައި ސައިކަލު ދުއްވި މީހާގެ މޫނުގެ ކަނާތް ފަޅިން ވަރަށް ބޮޑަށް މަށައިގެން ގޮސްފައިވާ ކަމަށެވެ. އަދި ފަހަތުގައި އިން އަންހެން މީހާގެ ގައިގެ އެކި ތަންތަނުން ހަން މަށައިގެން ގޮސް އެކިވަރުގެ އަނިޔާވެފައިވާ ކަމަށް ފުލުހުން ބުނެއެވެ.
މި އެކްސިޑެންޓުގައި ސައިކަލު ދުއްވަން އިން މީހާގެ އަތުގައި ސައިކަލު ދުއްވުމުގެ ލައިސެންސް ނެތް ކަމަށް ފުލުހުން ބުނެއެވެ. ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
