ހަރުކަށި ފިކުރަށް ފާޅުގައި ދެކޮޅު ހެދުމަށް ރައީސް އިބްރާހިމް މުހައްމަދު ސޯލިހް ގޮވާލައްވައިފިއެވެ.
ރައީސް ސޯލިހް މިފަދައިން ގޮވާލެއްވީ، ތ. ވިލުފުށީގައި ބޭއްވި ދިވެހިންގެ އެއްބައިވަންތަކަމުގެ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުންނެވެ. ދިވެހިންގެ އެއްބައިވަންތަކަމުގެ ދުވަހަކީ، މީގެ 15 އަހަރު ކުރިން ރާއްޖެއަށް އެރި ހިތާމަވެރި، ގުދުރަތީ ކާރިސާ ކަމަށްވާ ސުނާމީގައި ދިވެހިން ދެއްކި އެއްބައިވަންތަކަން ފާހަގަކުރުމުގެގޮތުންނެވެ.
މި ޖަލްސާގައި ވާހަކަފުޅު ދައްކަވަމުން ރައީސް ސޯލިހް ވިދާޅުވީ މުޅި ގައުމުގެ ހާލަތަށް ބަލާއިރު، ދިވެހިންގެ އެއްބައިވަންތަކަމާއި އެކުވެރިކަން ކުރިއަށް ނެރެގެން ނޫނީ ހައްލުކުރަން ދަތި ކިތަންމެ މައްސަލައެއް މިހާރުވެސް ދިވެހިންގެ ތެރޭގައި އެބަހުރި ކަމަށެވެ އެގޮތުން، ދީނުގެ ނަމުގައި ފަތުރާ ހަރުކަށި ފިކުރުތަކާއި، ހިންގާ ހަރުކަށި އަމަލުތައް، ދީނަށް އިހާނެތިކުރުމުގެ މަސައްކަތް، މާރާމާރީތަކާއި ގޭންގު ކުށްތައް އަދި މަސްތުވާތަކެތީގެ މައްސަލަތައް ރައީސް ފާހަގަ ކުރެއްވިއެވެ.
ރައީސް ސޯލިހް ވިދާޅުވީ، މިފަދަ ކަންކަމަކީ ގާނޫނުތައް ނެތިގެން، ނުވަތަ އަދަބުތައް ކަނޑައެޅިފައި ނެތިގެން ހިނގާ ކަންކަން ނޫން ކަމަށެވެ. އަދި މި ބާވަތުގެ ކޮންމެ ކަމަކީވެސް، ފަރުދީ ޒިންމާއަށް އިހުމާލުވުމުގެ ނަތީޖާ ކަމަށާއި، މުޖުތަމައުގެ މަސްލަހަތުގެ މައްޗަށް ތިމާގެ އަމިއްލަ ކަންކަން އިސްކުރުމުގެ ނަތީޖާ ކަމަށެެވ. އަނެކުންގެ ހައްގުތަކަށް އަރިގަނެގެން ވިޔަސް، ތިމާގެ އަމިއްލަ އެދުންތައް ހާސިލުކުރަން އުޅުމުން، ގެއްލިގެން ދަނީ މުޅި މުޖުތަމައުގެ ހަމަޖެހުމާއި އަމާންކަން ކަމުގައި އެމަނިކުފާނު ވިދާޅުވިއެވެ.
މިފަދަ ހުރިހާ ކަމަކަށް ފާޅުގައި ދެކޮޅުހަދައި، އެފަދަ ކަންކަން ހުއްޓުވުމަށް މަސައްކަތް ކުރުމަށް މިއަދު ހުރިހާ ދިވެހިން އަޒުމު ކަނޑައަޅަން ޖެހޭ ކަމަށް އެމަނިކުފާނު ވިދާޅުވިއެވެ. އަދި އެފަދަ ކަންކަން ސިއްރުނުކޮށް، ކަމާބެހޭ އިދާރާތަކާ އެފަދަ މައުލޫމާތު ހިއްސާކޮށް، މުޅި މުޖުތަމައު އެކުގައި ހަރުކަށި ފިކުރާ ދެކޮޅަށް ތެދުވެގެން ނޫނީ، ކިތަންމެވަރަކަށް މި ވާހަކަތައް ދެއްކިޔަސް، މިކަންކަން ހައްލު ނުކުރެވޭނެ ކަމަށް ރައީސް ސޯލިހް ވިދާޅުވިއެވެ.
ހަރުކަށި ފިކުރުގެ އަމަލުތަކުގައި ހަރަކާތްތެރިވާ ހުރިހާ ފަރާތްތަކަށް ވެސް، ރައީސް ސޯލިހް ވަނީ އިލްތިމާސެއް ކޮށްފައެވެ. އެގޮތުން، އެމަނިކުފާނު ވަނީ ނުރަނގަޅު މަގު ދޫކޮށް، އިސްލާހުގެ މަގު ހިޔާރުކުރުމަށް އަދި ވަގުތު ފާއިތު ނުވާ ކަމަށް ވިދާޅުވެ، އެކަހެރިވުމާއި ވަކިވެގަތުމުގެ ގޮތްތައް ދޫކޮށް، އިޖުތިމާއީ މިންގަނޑުގެ ތެރެއަށް ވަނުމަށް ސަމާލުކަންދިނުމަށް އިލްތިމާސްކޮށްފައެވެ. ރައީސް ސޯލިހް ވިދާޅުވީ، އެއްވެސް ރައްޔިތަކަށް ދެރަގޮތެއް ވުމަކީ، އެމަނިކުފާނު އެދިލައްވާ ގޮތެއް ނޫން ކަމަށާއި،އިސްލާހުގެ މަގު ހިޔާރު ކުރުމުން، ދެ ދުނިޔޭގައިވެސް ކާމިޔާބާއި ބާއްޖަވެރިކަން ލިބޭނެ ކަމަށެވެ.
މީގެ އިތުރުން އެމަނިކުފާނު ވިދާޅުވީ، މިއަދު ދިވެހިން އެއްބައިވާންޖެހިފައި މިވަނީ، ހަރުކަށި ފިކުރާ ދެކޮޅަށް ކަމަށެވެ. އެގޮތުން، އެންމެން އެއް އަޒުމެއްގައި، އެއް ރޫހެއްގައި މި މައްސަލަތައް ހައްލުކުރުމަށް މަސައްކަތް ކުރަން ޖެހޭ ކަމަށް ވިދާޅުވެ ރައީސް ސޯލިހް ވަނީ މިގައުމުގެހަމަޖެހުމާއި ސުއްހައާއި އަމާންކަން ދެމިއޮންނާނީ، އެންމެން އެކަންކަމަށް އިސްކަންދިން މިންވަރަކުން ކަމަށް ވިދާޅުވެފައެވެ.
