ކ. މާފުށި ބިން ހިއްކުމުގެ އަމަލީ މަސައްކަތް މިއަދު ފަށައިފިއެވެ.
މާފުށީގައި މިއަދު ބޭއްވި ރަސްމިއްޔާތެއްގައި އެރަށު ބިން ހިއްކުމުގެ މަސައްކަތް ފައްޓަވައިދެއްވީ ރައީސްގެ އެޑްވައިޒަރު މުހައްމަދު ޝިހާބެވެ. ރަސްމިއްޔާތުގައި ޕްލޭނިން މިނިސްޓަރު މުހައްމަދު އަސްލަމްވެސް ބައިވެރިވެވަޑައިގެންފައިވެއެވެ.
މާފުށީ ބިން ހިއްކުމުގެ މަޝްރޫއު ހަވާލުކޮށްފައި ވަނީ 99.98 މިލިއަން ރުފިޔާ އަށެވެ. އެމައްސައްކަތް ވަހާލުކޮށްފައިވަނީ އެމްޓީސީސީއަށެވެ. އެމަސައްކަތް އެމްޓީސީސީއާ ހަވާލުކޮށްފައިވަނީ 255 ދުވަސް ތެރޭގައި ނިންމުމަށެވެ.
މި މި މަޝްރޫއުގެ ދަށުން 25 ހެކްޓަރުގެ ބިން ހިއްކާ، 1110 މީޓަރުގެ ރިވެޓްމަންޓެއް މާފުށީގައި ގާއިމްކުރާނެއެވެ. ޕްލޭނިން މިނިސްޓްރީން ބުނީ މާފުށީ ބިން ހިއްކުމުގެ މަޝްރޫއުގެ ސަބަބުން އެރަށަށް ދިމާވެފައިވާ ގެދޮރުގެ ދަތިކަމާއި ތޮއްޖެހުމާއި ގޮނޑުދޮށް ސަރަހައްދުގެ ކުޑަ ކަމަށް ލުއި ލިބިގެންދާނެ ކަމަށެވެ.
މާފުށި ބިން ހިއްކުމުގެ މަސައްކަތަކި ރައީސް އިބްރާހިމް މުހައްމަދު ސޯލިހްގެ ވައުދުފުޅެކެވެ. މާފުށި ބިން ހިއްކަވާނެ ކަމަށް ރައީސް ވައުދުވެވަޑައިގެންފައިވަނީ ރިޔާސީ އިންތިހާބުގެ ކެމްޕެއިން ތެރޭ މާފުއްޓަށް ވަޑައިގެން ބޭއްވި ޖަލްސާއެއްގައިއެވެ.
