ވައްކަމުގެ މައްސަލައެއްގައި ފުލުހުން އައްޑޫ ސިޓީއިން ހައްޔަރުކުރި މީހަކު ފިލައިފިއެވެ.
ފުލުހުން ބުނީ މިއަދު މެންދުރުފަހުގެ ވަގުތެއްގައި އައްޑޫ ސިޓީ ހިތަދޫ ޕޮލިސް ސްޓޭޝަންގައި ބަންދުގައި ހުރި 34 އަހަރުގެ ދިވެހި ފިރިހެނަކު ފިލާފައިވާ ކަމަށެވެ. އެމީހާއަކީ ވައްކަމުގެ މައްސަލައެއްގައި ހުކުމް ތަންފީޒު ކުރުމަށް މިދިޔަ ހޯމަ ދުވަހު މާލެ ފޮނުވަން ފުލުހުންގެ ބެލުމުގެ ދަށަށް ގެންދިޔަ މީހެއް ކަމަށްވެސް ފުލުހުން ބުންޏެވެ.
އޭނާ ފިލީ، ފުލުހުންގެ ބެލުމުގެ ދަށުގައި ޕޮލިސް ޕޯސްޓުގައި ހުއްޓާ ކަމެއް، އޭނާ މާލެ ފޮނުވާލުމުގެ މަގުމަތީގައި ކަމެއް ނުވަތަ، ފުލުހުންގެ އިހުމާލުން ކަމެއް ފުލުހުން ހާމައެއް ނުކުރިއެވެ.
ފުލުހުން މިހާރު ގެންދަނީ އެމީހާ ހޯދުމުގެ މަސައްކަތް ކުރަމުން ކަމަށް ވަނީ ބުނެފައެވެ.
