ރައީސް އިބްރާހީމް މުހައްމަދު ސޯލިހް، ޖުޑީޝަލް ސަރވިސް ކޮމިޝަން (ޖޭއެސްސީ) ގެ މެންބަރުކަމަށް، އަލްއުސްތާޒު އަލީ ސަމީރު މިއަދު އައްޔަން ކުރައްވައިފިއެވެ.
އަލީ ސަމީރަކީ މައްޗަން ގޮޅި ވޭސައިޑް ފްލެޓް 610 އަށް ނިސްބަތްވާ ބޭފުޅެކެވެ. ރައީސް ސޯލިހް، ސަމީރު އެމަގާމަށް ހަމަޖެއްސެވީ ގާނޫނު އަސާސީގެ 158 ވަނަ މާއްދާގެ (ނ) އާއި، ޖުޑީޝަލް ސާވިސް ކޮމިޝަނުގެ ގާނޫނުގެ 3 ވަނަ މާއްދާގެ 3 ވަނަ ނަންބަރުގައި ބަޔާންކޮށްފައިވާ ގޮތުގެމަތިން، ހައިކޯޓުގައި ހިމެނޭ ފަނޑިޔާރުންގެ ތެރެއިން، އެ ކޯޓުން އިންތިހާބުކުރާ ފަނޑިޔާރެއްގެ ހައިސިއްޔަތުންނެވެ.
ޖުޑީޝަލް ސަރވިސް ކޮމިޝަންގެ މެންބަރުކަމަށް އައްޔަން ކުރެއްވުމުގެ ކުރިން، ޖުޑީޝަލް ސާވިސް ކޮމިޝަންގެ މެންބަރުކަމުގެ ހުވައި ސަމީރު، ރައީސްގެ ކުރިފުޅުމަތީގައި ކުރެއްވިއެވެ. ސަމީރަށް ހުވައިލައިދެއްވީ، ސުޕްރީމް ކޯޓުގެ ފަނޑިޔާރު އޮނަރަބަލް އަލްއުސްތާޒާ ޢާއިޝާ ޝުޖޫން މުހައްމަދެވެ. މިރަސްމިއްޔާތުގައި ޖޭއެސްސީގެ މެންބަރު ކަމަށް އައްޔަން ކުރެއްވި ކަމުގެ ލިޔުން، ރައީސް، ސަމީރާ ވަނީ ހަވާލުކުރައްވާފައެވެ.
