ސުޕްރީމް ކޯޓުގެ ފަނޑިޔާރު ކަމަށް ހޮވުމަށް ހުސްނުއްސުއޫދުގެ ނަން މަޖިލީހުގައި ދިރާސަ ކުރަމުން ދަނިކޮށް އޭނާގެ ޝަކުވާއެއް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާއި، ޖުޑިޝަލް ސާވިސް ކޮމިޝަން (ޖޭއެސްސީ)ގެ ރައީސް ހިސާން ހުސެއިނަށް ހުށަހަޅައިފިއެވެ.
ކާށިދޫ ދާއިރާގެ މެންބަރު އަބްދުﷲ ޖާބިރު މިއަދު މަޖިލީހުގެ ރައީސަށާއި، ޖޭއެސްސީގެ ރައީސަށް ސިޓީއެއް ހުށަހަޅާފައި ވަނީ ރާއްޖޭގެ ޖުޑިޝަރީ އިސްލާހު ކުރުމަށްޓަކައި މި ސަރުކާރުން ކުރާ މަސައްކަތުގެ ދަށުން ސުއޫދު ފަދަ މީހަކު ރާއްޖޭގެ އެންމެ މަތީ ކޯޓުގެ ފަނޑިޔާރަކަށް ލުމަކީ ފަނޑިޔާރުގެ ކޮރަޕްޝަނުން ސަލާމަތްކުރުމަށް އޮތް ހުރަހެއް ކަމަށް ވިދާޅުވެއެވެ. އެގޮތުން، ޖާބިރު ވަނީ ސުއޫދުގެ މައްޗަށް ކޮރަޕްޝަން ހިންގުމާއި، ރިޝްވަތު ނެގުމުގެ ތުހުމަތު ކުރައްވާފައެވެ.
ޖާބިރުގެ ސިޓީގައި ބުނީ، ޖާބިރުގެ ހިއްސާ އޮތް އެޓޯލް ޑައިވިން ޓުއާސް މޯލްޑިވްސް ޕްރައިވެޓް ލިމިޓެޑުން ބޮލިފުށި ޑައިވިން ސްކޫލް ކުއްޔަށް ހިފާ، އެތައް ހިންގަމުން ގެންދިޔަ ދުވަސްވަރު ޑައިވިން ސްކޫލަށް ލިބެމުން ދިޔަ ފައިސާ، ބޮލިފުށި ރިސޯޓުން ބަލައިގަނެ، އެ ފައިސާ އެ ކުންފުންޏަށް ނުދީ ހިފަހައްޓާފައިވާ ކަމަށެވެ. އަދި އެ ފައިސާ ހޯދުމަށްޓަކައި، ޑައިވިން ޓުއާސް ކުންފުނިން މަސައްކަތް ކުރުމުން އެ ހައްގު ނުދިނުމަށްޓަކައި، ޑައިވިން ސްކޫލް ހިނގިޔަ ނުދީ، އެ ހިދުމަތްދޭން ފޮނުވާފައި ތިބި މުވައްޒަފުންނާއި މެދު އިންސާނިއްޔަތާއި ހިލާފު އެތައް އަމަލެއް ހިނގާފައިވާ ކަމަށް އެ ސިޓީގައިވެއެވެ.
ޑައިވިން ޓުއާސްގެ މުވައްޒަފުންނާއި މެދު ބޮލިފުށި ރިސޯޓު ހިންގުމާއި ހަވާލުވެ ހުންނެވި ހުސެއިން ޝަރީފް ހިންގާފައިވާ އަމަލުތަކުގެ ތެރޭގައި އެ މުވައްޒަފުން ތިބި އިމާރާތުން ފެނާއި ކަރަންޓު ކަނޑާލައި، ނިދިޔަ ނުދިނުމަށް އެތަނުގެ ބޭރުގައި ކޮންކްރީޓް މެޝިނެއް ބަހައްޓައިގެން އެ ހިންގާ އަދި މިރުހުން ދުން އެރުވުމުގެ އިތުރުން އެ މުވައްޒަފުންނަށް ކާންނުދީ އެމީހުންގެ އަންނައުނާއި ހިފާގެންގުޅޭ ތަކެތި ބޭރަށް އުކާލުން ހިމެނެއެވެ.
ޖާބިރު ވިދާޅުވީ، މި މައްސަލާގައި ސުއޫދު ވަނީ ޑައިވިން ޓުއާސްއާ އެއްކޮޅަށް ވަކާލާތު ކޮށްފައި ކަމަށާއި ނަމަވެސް ފަހުން، މި މައްސަލާގައި ސުއޫދު ވަނީ ހުސެއިން ޝަރީފާ އެއްކޮޅަށް ވަކާލާތުކޮށްފައި ކަމަށެވެ. ޖާބިރު ވަނީ ސުއޫދުގެ މައްޗަށް ފައިސާއަށް ދަހިވެތިވާ ކަމަށް ތުހުމަތު ކުރައްވާ، ރާއްޖޭގައި ހިންގާފައިވާ ބޮޑެތި މައްސަލަތަކުގައި ބައިވެރިވާ މުޖުރިމުންގެ މައްޗަށް ދައުލަތުން އުފުލި އެތައް ދައުވާއެއްގައި ފައިސާއަށްޓަކައި ހަގީގަތާއި ދެކޮޅަށް ވަކަލާތުކޮށްފައި ކަމަށެވެ.
ޖާބިރު ވިދާޅުވީ، ޑައިވިން ޓުއާސް އަދި ބޮލިފުށި ރިސޯޓާއި ދެމެދު ޖެހުނު މައްސަލައާ ގުޅޭގޮތުން ހިނގާފައިވާ ކަންކަމުގެ ހެކި، މިނިސްޓްރީ އޮފް ޓޫރިޒަމާއި މޯލްޑިވްސް ޕޮލިސް ސާވިސަސްގެ ރިކޯޑް ތަކުން އަދި ޝަރީއަތުގައި ހިންގާފައިވާ އެ ކުންފުނީގެ މައްސަލަތަކުގެ ރިޕޯޓްތަކުން އެނގެން ހުންނާނެ ކަމަށެވެ.
