ހުސްވެފައިވާ ޕްރޮސެކިއުޓަރ ޖެނެރަލްގެ (ޕީޖީ) މަގާމަށް ކުރީގެ ޑެޕިއުޓީ ޕްރޮސެކިއުޓާ ޖެނެރަލް (ޑީޕީޖީ) ހުސައިން ޝަމީމު ކުރިމަތިލައްވައިފިއެވެ.
ޕީޖީގެ މަގާމަށް ކުރިމަތިލާން ރައީސް އޮފީހުން ހުޅުވާލީ މިދިޔަ ބުރާސްފަތި ދުވަހު އެ މަގާމުގައި ހުންނެވި އައިޝަތު ބިޝާމް މަގާމުން އިސްތިއުފާ ދެއްވުމާ ގުޅިގެންނެވެ.
ބިޝާމް އިސްތިއުފާ ދެއްވުމާ ގުޅިގެން ޕީޖީ ކަމުގެ މަގާމަށް ކުރިމަތިލާން ހުޅުވާލި މުއްދަތު މިއަދަށް ހަމަވެފައިވާއިރު، އެ މަގާމަށް ތިން ބޭފުޅަކު ކުރިމަތިލައްވާފައިވެއެވެ. އެ ބޭފުޅުންނާ ގުޅޭ އެއްވެސް މައުލޫމާތެއް ރައީސް އޮފީހުން ހާމަކޮށްފައެއް ނުވެއެވެ.
އެނގިފައިވާ ގޮތުގައި އެ މަގާމަށް ކުރިމަތިލެއްވި ބޭފުޅުންގެ ތެރޭގައި ޝަމީމު ހިމެނިވަޑައިގަންނަވައެވެ.
ޕީޖީގެ މަގާމަށް ކުރިމަތިލެއްވި ބޭފުޅުންގެ ނަންތައް ރައީސުލްޖުމްހޫރިއްޔާ އިސްކަންދެއްވާ ތަރުތީބުން ލިސްޓު ކުރެއްވުމަށްފަހު ދެން ފޮނުއްވާނީ ރައްޔިތުންގެ މަޖިލީހަށެވެ.
