ފާއިތުވީ 3 މަސް ދުވަހުގެ ތެރޭގައި، ސައުދީ އަރަބިއްޔާގެ ޙައްޖު އެންޑް އުމްރާ މިނިސްޓްރީއިން 1.3 މިލިއަނަށްވުރެ ގިނަ ވިސާ، އުމްރާގެ އަޅުކަމަށް ހާއްސަކޮށްގެން ދޫކޮށްފައިވާކަމަށް ތަފާސް ހިސާބުތަކުން ދައްކައިފިއެވެ.
ސައުދީ އަރަބިއްޔާއިން ބުނީ އުމްރާގެ އަޅުކަން އަދާކުރުމަށް 1133365 މުސްލިމުން އުމްރާގެ އަޅުކަމަށް ސައުދީ އަރަބިއްޔާއަށް ދަތުރުކުރި ކަމަށާ، އޭގެ ތެރެއިން 835874 މީހުން މިހާރު އެމީހުންގެ އަމިއްލަ ވަޒަނަށް އެނބުރި ގޮސްފައިވާ ކަމަށެވެ. 297491 މުސްލިމުން އަދިވެސް ސައުދީ އަރަބިއްޔާގައި އުމްރާގެ އަޅުކަން ފުރިހަމަ ކުރަމުންދާ ކަމަށްވެސް ސައުދީ އަރަބިއްޔާއިން ވަނީ ހާމަކޮށްފައެވެ.
1099608 މުސްލިމުން ސައުދީ އަރަބިއްޔާއަށް ދަތުރުކުރީ ވައިގެ މަގުން ކަމަށްވާއިރު 44750 މީހުން ސައުދީއަށް އެތެރެވީ އެއްގަމު މަގުންނެވެ. އަދި 7 މީހަކު ކަނޑުމަގުންވެސް ސައުދީއަށް ދަތުރުކޮށްފައިވާކަމަށް އެ ގައުމުން ވަނީ ހާމަކޮށްފައެވެ.
އުމްރާގެ އަޅުކަން އަދާކުރުމަށް ސައުދީއަށް މުސްލިމުން ދަތުރުކުރި ގައުމުތަކަށް ބަލާއިރު ލިސްޓުގެ އެންމެ ކުރީގައި، 319494 މީހުންނާއެކު އޮތީ ޕާކިސްތާނެވެ. ލިސްޓުގެ 2 ވާނާގައި އިންޑޮނޭޝިއާ އޮތްއިރު، މި ލިސްޓުގެ އެންމެ ކުރިން ދެން ޖާގަ ހޯދާފައިވަނީ މެލޭޝިއާ، ތުރުކީވިލާތް، ބަންގްލަދޭޝް، އަލްޖަޒާއިރު، މަޣްރިބުކަރަ، އިރާގު އަދި އުރުދުންއެވެ.
މިދުސްވަރަކީ އުމްރާގެ އަޅުކަމަށް ރާއްޖެއިންވެސް ގިނަ އަދަދެއްގެ ބަޔަކު ސައުދީ އަރަބިއްޔާއަށް ދަތުރުކުރަމުންދާ ދުވަސްވަރެކެވެ.
