ސަބް ކޮމިޓީ ސިއްރު ކުރީ އިދިކޮޅު މެންބަރުންނަށް ސަލަފާ ބެހޭގޮތުން ވާހަކަ ނުދެއްކޭނެ ކަމަށް ވިދާޅުވުމުން ކަމަށް ސަބް ކޮމިޓީގެ މުގައްރިރު އަދި ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވެއްޖެއެވެ.
މިރޭ ބޭއްވި ސަލާމަތީ ހިދުމަތްތަކާ ބެހޭ ކޮމިޓީގެ ބައްދަލުވުމުގައި ވާހަކަ ދައްކަވަމުން ހަސަން ލަތީފް ވިދާޅުވީ، އޭނާ ގާތު ވަރަށް ގިނަ އިދިކޮޅުގެ މެންބަރުން ޑރ. އަފްރާޝީމްގެ ރިޕޯޓާ ގުޅުން ހުރި މަސައްކަތްތައް ހިންގުމަށް ބާއްވާ ބައްދަލުވުން ސިއްރުކޮށް ދިނުމަށް އެދިވަޑައިގެންފައިވާ ކަމަށެވެ.
ސިއްރު ކުރައްވަން އެދިވަޑައިގަންނަވާ ސަބަބެއް ކަމުގައި އެބޭފުޅުން ވިދާޅުވެފައި ވަނީ ހުޅުވާލައިގެން ބާއްވާ ޖަލްސާތަކުގައި ސަލަފް ޖަމިއްޔާއާ ގުޅޭ ގޮތުން ދައްކަވަން ޖެހޭ ވާހަކަތައް ހިއްސާކުރަން އެ ބޭފުޅުންނަށް ފަސޭހަ ނުވާތީ ކަމަށް ވެސް ހަސަން ލަތީފް ވިދާޅުވިއެވެ. އެހެންކަމުން، އެކަމަށް އިހްތިރާމްކޮށް އިއްޔެގެ ޖަލްސާ ސިއްރުކޮށްފައި ވާނެ ކަމަށާއި، އިދިކޮޅު މެންބަރުންގެ ހިޔާލާއި ފިކުރު ހިއްސާކުރެެވޭނެ ގޮތަށް ކަންކަން ހަމަޖައްސާފައި ވާނެ ކަމަށް ހަސަން ލަތީފް ވިދާޅުވިއެވެ.
އިއްޔެ ބޭއްވުނު ސަބް ކޮމިޓީގެ ބައްދަލުވުމުގައި އެޖެންޑާ ކުރެވިފައިވަނީ ސަބް ކޮމިޓީގެ ރިޕޯޓު ކަމަށާއި، އެ ރިޕޯޓު ވިދާޅުވުމަށްފަހު މައި ކޮމިޓީގެ ބޭފުޅުން ނިންމެވީ އެ ރިޕޯޓަށް އިތުރު ރިކޮމެންޑޭޝަންސް ލާން ފެނިވަޑައިގަންނަވާ ކަމަށެވެ. އެހެންކަމުން އެ ރިކޮމެންޑޭޝަންސް ފާހަގަކުރައްވާ އަދި އެ ރިޕޯޓުގައި ހިމެނުމަށްފަހު ދެން އެކުލަވާލެވުނު ރިޕޯޓަކީ އެކޮމިޓީން ފާސްކުރި ރިޕޯޓްކަމަށް ހަސަން ލަތީފް ވިދާޅުވިއެވެ.
އިއްޔެ އެ ރިޕޯޓު އިއްވާފައި ވަނީ ސަބް ކޮމިޓީގެ ރިޔާސަތުގައި އިންނަވައިގެން ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް ކަމަށާއި އެ ރިޕޯޓަށް ވޯޓަށް އެހުމުން މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވޯޓު ދެއްވާފައިވާ ކަމަށް ހަސަން ލަތީފް ވިދާޅުވިއެވެ. މިހެން ކަން ހިނގާފައިވާ އިރު މި ރިޕޯޓަކީ ހަސަން ލަތީފް އެކަނި ލިޔެފައިވާ ރިޕޯޓެއްކަމަށް ދޭހަވާގޮތަށް ވާހަކަ ދައްކެވުމުން މީޑިއާއިން ސުވާލުކުރި ކަމަށް އޭނާ ވިދާޅުވިއެވެ. ނަމަވެސް ވަކި އެއްޗެއް ވިދާޅުނުވި ސަބަބު ހާމަކުރައްވަމުން ހަސަން ލަތީފް ވިދާޅުވީ، އެއީ ސިއްރު ކޮމިޓީއަކަށް ވާތީ އެ ސިއްރު ކޮމިޓީގައި ހިނގި ކަންކަމަކީ މުގައްރިރު ވިޔަސް ހާމަނުކުރެވޭނެ ކަމެއް ކަމަށެވެ. އަދި އެއީ ސުލޫކީ ގޮތުންވެސް އޭނާއަށް ކުރެވޭނެ ކަމެއް ނޫން ކަމަށް ވިދާޅުވިއެވެ.
ފަރެސްމާތޮޑާ ދާއިރާގެ މެންބަރު ކޮމެޓީގައި އިންވައިގެން އެ ރިޕޯޓު ފައިނަލް ކުރައްވާ ހުރިހާ ކަމެއް ކުރައްވާފައިވާކަން ފާހަގަކުރައްވަމުން ހަސަން ލަތީފް ވިދާޅުވީ، މިިދިޔަ އަންގާރަ ދުވަހު ކޮމިޓީގެ ކޯރަމާ އެކީގައި ހަވީރު 16:25 އިން 18:00 އަށް ހިންގި އެ ކޮމީޓިގެ ތިންވަނަ ބައްދަލުވުމުގައި ފަރެސްމާތޮޑާ ދާއިރާގެ މެންބަރު އިންނަވައި އެހުރިހާ ކަމަކަށް އެއްބަސްވެވަޑައިގެން ނުކުމެވަޑައިގެންނެވީ ކަމަށެވެ. އަދި އިދިކޮޅުން ބޭއްވި ޕްރެސް ކޮންފަރެންސްގައި އެއިން ބޭފުޅަކު ބައިވެރިވުމެއް ނެތި ހަދާފައިވާ ރިޕޯޓެއްކަމަށް އެ މެންބަރުންނަށް ވިދާޅުވެވޭނެ އެއްވެސް ޖާގައެއް ނެތް ކަމަށް ހަސަން ލަތީފް ވިދާޅުވިއެވެ.
ސަބް ކޮމިޓީގެ ތިން ބައްދަލުވުމެއް މިހާތަނަށް އައި އިރު ވަނީ ބާއްވާފައެެވެ. އެ ކޮމިޓީގައި ހެދި ރިޕޯޓާ ގުޅިގެން ހޫނު ބަހުސްއަކަށް ގޮސްފައިވާއިރު ފަރެސްމާތޮޑާ ދާއިރާގެ މެންބަރު ހުސައިން ވިދާޅުވެފައި ވަނީ، މަރު ކޮމިޝަނުން ޑރ. އަފްރާޝީމްގެ މަރުގެ ރިޕޯޓް ހެދި ގޮތަށް 241 ކޮމިޓީން ނެގި ސަބް ކޮމިޓީން ރިޕޯޓް ހަދާފައިވަނީ އެންމެ މެންބަރެއް ކަމަށެވެ. މަރު ކޮމިޝަނުގައި 5 މެންބަރުން ތިބޭ އިރު އެމިޝަންގެ ރިޕޯޓު ނިންމާފައި ވަނީ އެތަނުން 2 މެންބަރުން ކަމަށް އޭނާ ވިދާޅުވިއެވެ. ނަމަވެސް އެއީ ކޮން ދެ މެންބަރުންނެއް ކަމެއް އޭނާ ވިދާޅެއް ނުވެއެވެ.
ސަބް ކޮމިޓީ އުފައްދާ ގަވާއިދުގެ (ނ) ގައި ވާ ގޮތުގައި ސަބް ކޮމިޓީން ނިންމާ ނިންމުމަކީ މައި ކޮމިޓީން ހުށަހަޅައި، މައި ކޮމިޓީން އެ ނިންމުމާ މެދު ގޮތެއް ކަނޑައަޅަން ޖެހޭ ނިންމުމެކެވެ. މައި ކޮމިޓީން ސަބް ކޮމިޓީގެ ނިންމުން ގަބޫލު ކުރާ ނަމަ އެ ނިންމުމަކީ މައި ކޮމިޓީގެ ނިންމުމެއް ކަމުގައި ބެލޭވެނެއެވެ.
ކަލޭ ތެދެއް ހަދާފާނެހެން ހަމަ އެއްގޮތަކަށްވެސް ހިއެއްނުވޭ.