ސިފައިން ނިކުމެ، ހުރިހާ މިޔަރުތައް މަރާލުމަށް ކާށިދޫ ދާއިރާގެ މެންބަރު އަބްދުﷲ ޖާބިރު ގޮވާލައްވާފިއެވެ.
އެން ނަގަން ޑައިވް ކުރާ މަސްވެރިން ޑިކޯވުމާއި ގުޅިގެން މިއަދުގެ މަޖިލީހަށް ޖާބިރު ކުއްލި މައްސަލައެއް ހުށަހަޅުއްވާ އެ މައްސަލައަށް ބަހުސް ކުރައްވަމުން ވިދާޅުވީ، މަސްވެރިން އެން ހިފުމަށް އަޑިއަށް ދާން ޖެހޭ ސަބަބެއް އޮވެގެން ނުވާނެ ކަމަށާއި، ތިމާވެށި ހިމާޔަތް ކުރުމުގެ ނަމުގައި އަނގަޔާ އަތާ ދިމާނުވާ ގޮތަށް މަސްވެރިކަމުގެ ޕޮލިސީ ކަނޑައަޅާފައި އޮންނަ ކަމަށެވެ.
ދާ އަޅައިގެން މަސްވެރިކަން ކުރުމުގެ ހުއްދަ ވެސް ދޭން ޖެހޭނެ ކަމަށާއި، ވަގުތުން މިޔަރުތައް ވެސް ނަގަންވީ ކަމަށް ވިދާޅުވެ، ޖާބިރު ވިދާޅުވީ، ބޮޑު ކަންނެއްޔެއް ބާނާއިރު، ދެބައިކުޅައެއްބައި އޮންނަނީ މިޔަރު ކާލާފައި ކަމަށެވެ. އަދި އެއްބައި ކާލާފައި އޮތުމުން، އެ ކަންނެލި އޮންނަނީ ކިރުމުން މަހުރޫމުވެފައި ކަމަށް ވިދާޅުވެ ކަންބޮޑުވުން ފާޅު ކުރައްވަމުން އޭނާ ވަނީ ހުރިހާ މިޔަރުތައް މަރާލުމަށް ސިފައިންނަށް ގޮވާލައްވާފައެވެ.
ޖާބިރު ވިދާޅުވީ، އެންވެރިކަން ދިރުވަން ބޭނުންވަނީ މީހުން މަރުނުވާގޮތަށް ކަމަށާއި އެކަން ނުކުރަންވީ ސަބަބެއް ނެތް ކަމަށެވެ. އަދި އެންވެރިކަން ދިރުވާ، މަސްވެރިން ދާގޮތަށް ގޮސް އެން ގަނެގެން މަހަށް ދެވޭނެ ގޮތް ހަމަޖައްސަން ޖެހޭ ކަމަށާއި މަސްވެރިން އެއްފަރާތް ޕެރެލައިޒްވެފައި މަރުވާކަށް ނުޖެހޭނެ ކަމަށް ޖާބިރު ވިދާޅުވިއެވެ. ޖާބިރު ވިދާޅުވީ، އެހިސާބަށް ވިސްނުން ބަހައްޓައިގެން މަސްވެރިކަމާ ބެހޭ ގާނޫނު އޮޕަރޭޓް ކުރަން ޖެހޭ ކަމަށެވެ.
މީގެ އިތުރުން ޖާބިރު ވިދާޅުވީ، މަސްވެރިންނަކީ ރާއްޖޭގެ އިގްތިސޯދު ވަރަށް ބޮޑުތަނުން ކުރިއަރުވާ ބައެއް ކަމަށާއި، މަސްވެރިން ޑީކޯ ވުމުގެ މައްސަލަ ތަކުރާރުކޮށް ދިމާވަމުން ދާތީ ޗެމްބަރު ހަދިޔާ ކުރުމަށް ފިޝަރީސް މިނިސްޓަރު ޒަހާއަށް ވިދާޅުވި ކަމަށާއި ނަމަވެސް، އެކަމާ ބެހޭގޮތުން ލިޔުއްވަން ޖެހިވަޑައިގަންނަވާނީ އިކޮނޮމިކް މިނިސްޓަރަށް ކަމަށް ޒަހާ ވިދާޅުވި ކަމަށެވެ. އަދި ފިޝަރީޒް މިނިސްޓްރީއެއް އޮވެ، އެ މިނިސްޓްރީގައި ބާރެއް ނެތި، އިކޮނޮމިކް މިނިސްޓްރީއަށް ބާރުދީފައި އޮތުމަކީ ހިތާމަ ކުރައްވާ ކަމެއް ކަމަށް ވިދާޅުވެ ޖާބިރު ވަނީ ފިޝަރީސް ޕޮލިސީ ކަނޑައަޅަން ވާނީ ފިޝަރީސް މިނިސްޓަރު ކަމަށާއި، އެކަން އެހެން ނުވާ ނަމަ ފިޝަރީޒް މިނިސްޓްރީ އުވާލުމަށް ގޮވާލައްވާފައެވެ.
މިއަދުގެ ޖަލްސާއަށް ކުއްލި މައްސަލަ ހުށަހަޅުއްވަމުން ޖާބިރު ވިދާޅުވީ، މަސްވެރިކަމުގެ މަސައްކަތަކީ ރައްޔިތުންގެ އާމްދަނީއާ ގުޅިފައިވާ ކަމެއް ކަމަށް ވުމާއެކު، ބޭނުންވާ މިންވަރާ ގާތަށް ވެސް އެން ނުލިބޭތީ ޑައިވްކޮށްގެން އެން ހިފުމަށް ދިވެހި މަސްވެރިންނަށް ވަނީ މަޖުބޫރުވެފައި ކަމަށެވެ. އަދި އެން ހިފުމަށް ޑައިވް ކުރާ ފަރާތްތައް ޑިކޯ ވުމަކީ މިހާރު އާންމުކޮށް ކުރިމަތިވަމުން އަންނަ ނުރައްކާތެރި މައްސަލައެއް ކަމަށާއި، ޑިކޯވާ ފަރާތްތަކަށް ދޭން ޖެހޭ އަވަސްފަރުވާ ދެވޭނެ އެއްވެސް ވަސީލަތެއް މަސްވެރި އަތޮޅުތަކުގައި ގާއިމްވެފައި ނެތުމުގެ ސަބަބުން އެތައް މަސްވެރިންނެއްގެ ފުރާނަ ގެއްލި، އެތައް މަސްވެރިންނެއް މިވަނީ ނުކުޅެދޭ ހާލަތަށް ބަދަލުވެފައި ކަމަށެވެ.
ޖާބިރު ވިދާޅުވީ، މަސްވެރިންގެ ފުރާނަ ގެއްލި، މަސްވެރިން ނުކުޅެދޭ ހާލަތަށް ބަދަލުވަނީ މަސްވެރިންގެ ސަލާމަތާއި ރައްކާތެރިކަމަށްޓަކައި ސަރުކާރުގެ ކަމާބެހޭ ފަރާތްތަކުން އަޅަންޖެހޭ ހަރުދަނާ ފިޔަވަޅުތައް ނާޅާ ތިބުމުގެ ނަތީޖާއެއްގެ ގޮތުން ކަމަށެވެ. އަދި ކުއްލި މައްސަލަ ހުށަހެޅުއްވީ ދިވެހި މަސްވެރިންނަށް ކުރިމަތިވެފައިވާ ނުރައްކާތެރި، ހިތްދަތި މައްސަލާގައި ރައްޔިތުންގެ މަންދޫބުންގެ މެދުގައި ފުޅާ ދާއިރާއެއްގައި ބަހުސްކޮށް މިކަން ސަރުކާރުގެ ސަމާލުކަމަށް ގެނައުމަށް ކަމަސް ޖާބިރު ވިދާޅުވިއެވެ.
މި ފެންވަރުގެ ބޭފުޅުން ރާއްޖޭގެ އިސްމަގާމް ތަކުގަ ތިބުމަކީ ދިވެހީންގެ ނުކުޅެދުންތެރި ކަމާ ނިކަމެތިކަން.