ފުރާޅުން ޓިނު ނަގައިގެން ހައްޔަރުކުރުމަށްފަހު ވެސް މީގެކުރިން ފަނޑިޔާރުން ރާއްޖޭގައި ވަކިކޮށްފައިވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވީ އުއްތަމަ ފަނޑިޔާރު ޑރ.އަހުމަދު އަބްދުﷲ ދީދީ އާއި ސުޕްރީމް ކޯޓުގެ ފަނޑިޔާރު އާދަމް މުހައްމަދު ފަނޑިޔާރު ކަމުން ވަކިކުރުމުގެ މައްސަލަ މިއަދުގެ ޖަލްސާ އަށް އެޖެންޑާ ކޮށްފައިވާތީ އެކަމަށް އިޝާރާތްކޮށް ދެއްކެވި ވާހަކަފުޅުގައެވެ. އެގޮތުން ނަޝީދު ވިދާޅުވީ ރާއްޖޭގައި މީގެކުރިން އުއްތަމަ ފަނޑިޔާރު ވަކިކޮށްފައި ހުރީ ވަރަށް ނާތަހުޒީބީ ގޮތްގޮތަށް ކަމަށާއި އެގޮތުން ރާއްޖޭގައި ރަސްކަން ކުރެއްވި ރަސްރަސްކަލުންގެ ލިސްޓަށްވުރެ ދިގުކޮށް ފަނޑިޔާރުންގެ ލިސްޓު އޮތް ހަޟާރަތެއް އެބައޮތް ކަމަށް ނަޝީދު ވިދާޅުވިއެވެ.
"1000 އަހަރު މެދު ނުކެނޑި އެކި އެކި ފަނޑިޔާރުން ފަނޑިޔާރުކަން ކުރައްވާފައި ތިއްބެވި ބޭފުޅުންގެ ލިސްޓު އެބައޮތް. އޭގެ ތެރެއިން ފަނޑިޔާރުން ފަނޑިޔާރުކަމުން ވަކި ކުރައްވާފައި އެބަހުރި ރަދުން ބާލާ އޮޑީގެ ބަނޑުފިލާ ދަށުލައިގެން. އަނެއްބައި ފަނޑިޔާރު ބޭކަލުން ކަފަ ބަދެފައި އަންދާފައި އެބަހުރި. ސިރާޖުއްދީނު ފަނޑިޔާރު މަނިކުފާނު އެ މަނިކުފާނަށް ކޮށްފައިވާ އަނިޔާ ފަހުން ލިޔުވާފައި އޮތްއިރު ތެޅި އަދަދާއި ލަކުނުގެ އަދަދު ކިޔުއްވާފައި އެބަހުރި" ނަޝީދު ވިދާޅުވިއެވެ.
އެންމެ ފަހުން ރަދުން އައްޔަން ކުރައްވާފައި ހުންނެވި ފަނޑިޔާރަކު ވަކި ކުރިތަން ފެނިފައިވަނީ ދަރަވަންދޫގޭ މުހައްމަދު ޖަމީލު ދިދީ ކަމަށާއި އެއަށްފަހު އުއްތަމަ ފަނޑިޔާރުގެ ބާރު ކުޑަވެފައި އޮށްވާ 2008 ވަނަ އަހަރު ތަސްދީގު ކުރެވުނު އާ ގާނޫނު އަސާސީ އަށްފަހު އުއްތަމަ ފަނޑިޔާރަކީ ބާރުވެރި އަދި މުސްތަގިއްލު ފަރާތެއް ކަމަށް ނިންމުނު ކަމަށްވެސް ނަޝީދު ވިދާޅުވިއެވެ.
އާ ގާނޫނު އަސާސީ އައިފަހުން އުއްތަމަ ފަނޑިޔާރު ވަކިކޮށްފައި ހުރީ ގާނޫނަށް ގެނައި ބަދަލަކުން އޮޅިގެންނާއި ނުވަތަ ފަނޑިޔާރު ގޭގެ ފުރާޅުން ޓިނު ނަގައިގެން ކަމަށް ނަޝީދުގެ ވާހަކަފުޅުގައި ވިދާޅުވިއެވެ.
"އަޅުގަނޑުމެން މިއަދު މަސައްކަތް މިކުރަނީ މި ގާނޫނު އަސާސީގައިވާ އިޖުރާތުތަކުގެ ތެރެއިން، އިސްލާމްދީނުގެ މަތިވެރި އުސޫލުތަކާއި ޑިމޮކްރެޓިކް ހަމަތަކުގެ ތެރެއިން ފަނޑިޔާރު މަނިކުފާނާ ގުޅޭގޮތުން ފިޔަވަޅު އެޅުމަށް" ނަޝީދު ވިދާޅުވިއެވެ،
ސުޕްރީމް ކޯޓުގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީއާ ސުޕްރީމް ކޯޓުގެ ފަނޑިޔާރު އާދަމް މުހައްމަދު މަގާމުން ވަކި ކުރުމުގެ މައްސަލަ މިއަދު އޮންނަ މަޖިލިސް ވޯޓު ގަޑީގައި ކުރިއަށް ގެންދާނެއެވެ.
ނަޝީދު ފަޑިޔާރުން ވަކިކުރީ އެއްވެސް ސަބަބެއްނެތި ކޯޓް ތަޅުލައިގެންނާ ސަބަބެއްނެތި ޤާޒީން ވަގަށްނަގާގެން. މީ ތަހުޒީބުގެ ކަންފުޅެއްވެސް ނެތް މީހުން ގަދަބާރުން ފަޑިޔާރުން ވަކިކުރާ ގޮތް.