އަންނަ އަހަރަށް ލަފާކުރާ ބަޖެޓުގައި ކާށިދޫ އެއާޕޯޓު ހިމެނުމަށް އެ ދާއިރާގެ މެންބަރު އަބްދުﷲ ޖާބިރު އެދިވަޑައިގެންފިއެވެ.
ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދަށް ފޮނުއްވި ސިޓީއެއްގައި ވަނީ، ކާށިދޫއަށް ދަތުރުފަތުރު ކޮށް އުޅުމަށް ހައްލެއް ގެނައުމަށާއި އެރަށުގެ ފަތުރުވެރިކަމުގެ ވިޔަފާރި ކުރިއެރުވުމަށާއި ރަށުގެ ރައްޔިތުންގެ މާލީ ފުދުންތެރިކަން އިތުރު ކުރުމަށް 2020 ގެ ބަޖެޓުގައި ކާށިދޫ އެއާޕޯޓުގެ މަޝްރޫއު ހިމަނައިދެއްވުމަށެވެ.
މީގެ އިތުރުން މި ސިޓީގައި ކާށިދޫއަށް އެއާޕޯޓެއް ބޭނުންވާ ސަބަބަކަށް ޖާބިރު ވިދާޅުވީ، މާ ކަނޑެއްގެ މަދުގައި އޮންނަ ރަށަކަށް ވުމާއި ދަތުރުފަތުރުކޮށް އުޅުމަށް އުނދަގޫތަކެއް ހުރުމުގެ ސަބަބުން އެ ރަށަށް ޒިޔާރަތް ކުރާ ފަތުރުވެރިންގެ އަދަދު މަދުވުމެވެ. އަދި ހަމަ އެހެންމެ ކާށިދޫއަކީ މަސްވެރިކަން ފަދަ އެއްވެސް މަސައްކަތެއްގެ މަންފާއެއް ލިބޭ ރަށަކަށް ނުވާތީ ރަށުފަތުރުވެރިކަން ތަރައްގީ ކުރުމަށް އެޅޭ ފިޔަވަޅަކަށްވެސް ވެގެން ދާނޭ ކަމަށެވެ.
ރަށު ފަތުރުވެރިކަމުގެ މަންފާ މާލެ ކައިރީ އާއި ކާށިދޫ ކައިރީ ހުރިހާ ރަށަކަށް ލިބެމުންދާއިރު ކާށިދޫއަށް ލިބެމުން ނުދާ ކަމަށްވެސް ޖާބިރުގެ ސިޓީގައި ވަނީ ފާހަގަކުރައްވާފައެވެ. ކާށިދޫ ރަށްޔިތުންނަށް އާމްދަނީ ހޯދުމުގެ ފުރުސަތު ގެއްލިފައި އޮތް އޮތުން ނިމުމަކަށް ގެނައުމަށާއި ދަތުރުފަތުރު ކުރުމަށް ލުއިފަސޭހަ ކޮށްދިނުމުގެ ގޮތުން، ކާށިދޫ ކައުންސިލުން ފާސްކޮށް ހުށަހަޅައިފައިވާ ގަރާރުގެ މަތިން މަޖިލީހަށް ސިޓީ ހުށަހެޅީ ކަމަށްވެސް ޖާބިރުގެ ސިޓީގައި ވެއެވެ.
ޖާބިރަކީ އޭނާގެ ދާއިރާއަށް ވަރަށް ގިނަ ކަންކަން ކޮށްދެއްވުމަށް މަސައްކަތް ކުރައްވާ މެންބަރެކެވެ. އެގޮތުން ކާށިދޫ ދާއިރާއަށް ވާދަކުރެއްވި އިރު، ޕީއެސްއެމް އިން ގެނެސްދިން ދާއިރާތަކުގެ މެންބަރުންގެ ބަހުސްގައި، ކާށިދޫއާ މާލެއާ ދެމެދު ކޭބަލް ކާރުގެ ހިދުމަތް ދެއްވާނެ ކަމަށް އޭނާ ވަނީ ވައުދުވެވަޑައިގެންފައެވެ.
