ހަކުރު ބަލީގެ ދުވަސް ފާހަގަކުރުމަށް ގިނަ ހަރަކާތްތަކެއް މިއަދު ކުރިއަށް ގެންދިއުމަށް ނިންމައިފި އެވެ.
މިދުވަސް ފާހަގަކުރުމުގެ ގޮތުން މިއަދު ހެނދުނު 10:00 އިން މެންދުރު 12.00 އަށް ހަކުރު ބައްޔަށް ޓެސްޓުކުރުމާއި، ހަކުރުބަލީގެ މައުލޫމާތުދިނުމަށް މާލޭގެ ނޯތު ހާބަރުގައާއި، އައިޖީއެމްއެޗްގައި ހަރަކާތްތަކެއް ކުރިއަށް ގެންދިއުމަށް ރާވާފައިވާ ކަމަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން ވަނީ މައުލޫމާތު ދީފަ އެވެ.
މީގެއިތުރުން މާލޭގެ އެކުވެނި ސަރަހައްދުގައާއި އެއާޕޯޓުގައި ހަކުރު ބައްޔަށް އާންމުން ހޭލުންތެރިކުރުވުމަށް ހަރަކާތްތަކެއް ކުރިއަސް ގެންދިއުމަށް ވެސް ވަނީ ރާވާފަ އެވެ. ދުނިޔޭގެ ހަކުރުބަލީގެ ދުވަސް ފާހަގަކުރުމުގެ ގޮތުން ކޮންމެ އަހަރަކުވެސް މިފަދަ ހަރަކާތްތައް އައިޖީއެމްއެޗުން ދަނީ އިންތިޒާމު ކުރަމުންނެވެ.
އިންޓަނޭޝަނަލް ޑައެބެޓީސް ފެޑަރޭޝަނުން މިއަހަރުގެ ހަކުރުބަލީގެ ދުވަހުގެ ޝިޔާރުގެ ގޮތުގައި މިދިޔަ އަހަރެކޭވެސް އެއްފަދައިން ކަނޑައަޅާފައިވަނީ "އާއިލާ އާއި ހަކުރުބަލި" އެވެ.
މި ޝިއާރުގެ މަގުސަދަކީ ހަކުރުބަލީގެ ސަބަބުން އާއިލާތަކަށް ދިމާވެދާނެ ގޮންޖެހުންތަކަށް ހޭލުންތެރިކޮށް، އެހީތެރިކަން ފޯރުކޮށްދިނުމަށް ކުރެވިދާނެ ކަންތައްތައް ދެނެގަނެ، ހަކުރު ބަލިން ރައްކާތެރި ވެވޭނޭ ގޮތްތަކާއި ހަކުރުބަލި ޖެހުމުން އެބައްޔަށް ފަރުވާ ކުރާނެ ގޮތްތަކާއި ބެހޭ ގޮތުން އާންމުންގެ ތެރޭގައި ހޭލުންތެރިކަން އިތުރު ކުރުމެވެ.
ހަކުރު ބަލި ދުރާލާ ދެނެގަނެ ހަށިގަނޑުގެ ދުޅަހެޔޮކަން ހެޔޮގޮތުގައި ބެލެހެއްޓުމަށް އަމަލުކުރެވިދާނެ ގޮތްތަކާބެހޭ މައުލޫމާތު ހިއްސާކުރުން ހިމެނެ އެވެ.
ހަކުރު ބަލީގެ ދުވަހާއި ގުޅިގެން ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ކޮށްފައިވާ ޓްވީޓެއްގައި ބުނީ ހަކުރުބައްޔަކީ ކޮންމެ އާއިލާއަކަށްވެސް އޭގެ އަސަރުކޮށްފާނެ ބައްޔެއް ކަމަށެވެ. އަދި ދިރިއުޅުމުގެ އާދަތަކަށް ސަމާލުވެ، ސިއްހަތަށް ފައިދާވާ ގޮތަށް އަމަލުތައް ބަހައްޓައިފިނަމަ އެ ބަލިން ރައްކާތެރިވެވިދާނެ ކަމަށްވެސް އެޗްޕީއޭއިން ބުނެއެވެ.
އެގޮތުން ކޮންމެ ދުވަހަކުވެސް މޭވާއާ ތަރުކާރީގެ ބާވަތްތައް ކެއުމާއި ހަކުރު ގިނައިން އެކުލެވޭ ބާވަތްތައް މަދުކުރުމާއި ދުވާލަކު މަދުވެގެން 30 މިނެޓު ކަސްރަތު ކުރުމަކީވެސް ހަކުރު ބަލި ޖެހުން ކުޑަ ކޮށްދޭނެ ކަންތައްތައް ކަމަށް އެޗްޕީއޭއިން ބުނެއެވެ.
