ރައްޔިތުންގެ މަޖިލީހުގެ އިދާރާއަށް މިއަދު ހަދިޔާކުރެއްވި ބަގީޗާ ގަސްތަކަކީ ކާށިދޫ ރައްޔިތުން ކުރާ އުއްމީދުގެ ރަމްޒެއް ކަމަށް ކާށިދޫ ދާއިރާގެ މެންބަރު އަބްދުﷲ ޖާބިރު ވިދާޅުވެއްޖެއެވެ.
ޖާބިރު ވިދާޅުވެފައި ވަނީ ބަޖެޓުގެ ބަހުސް މިއަދު ފެށޭއިރު ކާށިދޫ ރައްޔިތުންގެ ފަރާތުން މަޖިލީހަށް ހަދިޔާ ކުރެއްވީ ގަސްތަކަކީ އާމްދަނީ ހޯދާ ގަދަރުވެރި ދިރިއުޅުމެއް އުޅުމަށް ލޯބޯ ފިއްސައިގެން ރައްޔިތުން ކުރަމުން އަންނަ ބުރަ މަސައްކަތާއި އަދި ރައްޔިތުން ކުރާ އުއްމީދުގެ ރަމްޒެއް ކަމަށެވެ.
މަޖިލީހުގެ މިއަދުގެ ޖަލްސާ ފައްޓަވަމުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ ކާށިދޫ އިން މަޖިލީހަށް ބަގީޗާ ގަސްތަކެއް ހަދިޔާކޮށްފައިވާ ކަމަށެވެ. އަދި އެކަމަށްޓަކައި ނަޝީދު ވަނީ ޝުކުރު އަދާކުރައްވައިފައެވެ. ނަޝީދު ވިދާޅުވީ ކާށިދޫ އަކީ ދަނޑުވެރިކަމާއި ގަސް ހެއްދުމުގައި ވަރަށް ކުރީގައި އޮތް ރަށެއް ކަމަށެވެ.
އަދި ރިސޯޓުތަކާއި އަލަށް ހިއްކާ ބިންތަކަށް ރަށްރަށުން ގަސް ގެންދިއުމަކީ މީހުން ވަރަށް ގިނައިން ޝަކުވާ ކުރާކަމެއް ކަމަށާއި އެ ތަންތަނަށް ބަގީޗާ ގަހާއި އެކި ކަހަލަ ގަސްތައް ބޭނުންވާކަމަށްވެސް ނަޝީދު ވަނީ ވިދާޅުވެފައެވެ.
މަޖިލީހަށް ހަދިޔާ ކުރެއްވި ގަސްތަކާ ހަވާލުވެވަޑައިގަތީ މަޖިލީހުގެ ރައީސް ނަޝީދެވެ.
