ކުރީގެ ރައީސް އަބްދުﷲ ޔާމީންގެ މައްޗަށް ދައުލަތުން ދައުވާކުރާ މަނީ ލޯންޑްރިން ގެ ކުށުގެ މައްސަލަ ބެލުމަށް ބެންޗެއް އެކުލަވާލައިފިއެވެ.
ކްރިމިނަލް ކޯޓުން މިއަދު ބުނީ، ރައީސް ޔާމީންގެ ޝަރީއަތް ކުރިއަށް ގެންދިއުމަށް ބެންޗެއް އެކުލަވާލުމަށް ނިންމާފައިވަނީ އެކަމަށް ރައީސް ޔާމީންގެ ފަރާތުން އިބްތިދާއީ މަރުހަލާގައި އެދިފައިވާ ކަމަށްބުނެ، ހުށަހަޅާފައިވާތީ ކަމަށެވެ. އަދި މި ނިންމުމް ނިންމާފައިވަނީ މި މައްސަލައިގެ ޒާތާއި ބާވަތަށާއި މައްސަލައިގެ ވަށައިގެންވާ ހުރިހާ ކަމަކަށް ރިއާޔަތްކޮށް، ކޯޓުތަކުގެ ގާނޫނުގެ ދަށުން ލިބިދޭ އިހްތިޔާރުގެ ދަށުންނެވެ.
ކްރިމިނަލް ކޯޓުގެ ހިންގުމާއިި މިހާރު ހަވާލުވެ ހުންނެވި ގާޒީ އަލީ ރަޝީދު ހުސެއިން ސޮއި ކުރައްވާ މިއަދު އާންމު ކުރެއްވި ގަރާރުގައި ބުނެފައިވަނީ މި މައްސަލަ ބެލުމަށް ކަނޑައަޅާފައިވަނީ 5 ފަނޑިޔާރުންގެ ބެންޗެއް ކަމަށެވެ. އަދި އެ ބެންޗުގައި ތިއްބަވާނީ ގާޒީ އަލީ ރަޝީދާއި، ގާޒީ އަހްމަދު ޝަކީލާއި، ގާޒީ މުހައްމަދު ސަމީރު އަދި ގާޒީ އަލީ އާދަމްގެ އިތުރުން ގާޒީ ހުސެއިން ފާއިޒް ރަޝާދެވެ.
ރައީސް ޔާމީންގެ މައްސަލަ ބެލުމަށް ބެންޗެއް އެކުލަވާލުމަށް ކުރިން ވެސް އެމަނިކުފާނުގެ ފަރާތުން ވަނީ އެދިފައެވެ. ނަމަވެސް، އެ މައްސަލަ ބެއްލެވި، ކްރިމިނަލް ކޯޓުގެ އިސް ގާޒީ، އަހްމަދު ހައިލަމް ވަނީ އެ ހުށަހެޅުމަށް އިންކާރުކޮށް، ބެންޗެއް އެކުނުލެއްވުމަށް ނިންމަވާފައެވެ.
މި ޝަރީއަތް ބެންޗަކުން ބަލަން ނިންމާފައިވަނީ، މި މައްސަލައިގެ ހުކުމާ ހަމައަށް ގޮސްފައިވަނިކޮށް، ވައިބާ ގްރޫޕަކަށް ގާޒީ ހައިލަމް ފޮނުއްވި ކުރެހުމަކާ ގުޅިގެން ރައީސް ޔާމީނަށް ހުކުމް ކުރަން އޮތް ދުވަހު އޭނާ ސަސްޕެންޑް ކުރުމާއި ގުޅިގެންނެވެ.
