ޔަމަނުގެ މުސްތަގުބަލަށް ބަލާއިރު ހަނގުރާމަވެރި ހޫތީންނަށް ފުރުސަތު އެބައޮތް ކަމަށް އެކުވެރި އަރަބި އިމާރާތް (ޔޫއޭއީ)ގެ މިނިސްޓާ އޮފް ސްޓޭޓް ފޯ ފޮރިން އެފެއާޒް އަންވަރު ގަރުގާޝް ވިދާޅުވެއްޖެއެވެ.
ގަރުގާޝް ވަނީ، ބައިނަލްއަގުވާމީ ފެންވަރުގައި ބަލައިގެންފައިވާ ޔަމަނުގެ މައި ސަރުކާރާ، އެ ސަރުކާރުން ވަކިވެގަތުމަށް މަސައްކަތް ކުރަމުންދާ ފަރާތްތަކާ ދެމެދު ދާދިފަހުން އެކުލަވާލި ސުލްހައިގެ އެއްބަސްވުން ކާމިޔާބު ވެދާނެ ކަމަށް ގަބޫލުކުރައްވާ ފަދަ މޭރުމަކުން ވާހަކަފުޅު ދައްކަވާފައެވެ.
އީރާނުގެ އެއްބާރުލުމާއެކު ޔަމަނުގެ ކޮންޓްރޯލް ނެގުމަށް ހަނގުރާމަ ކުރަމުންދާ ހޫތީން ވަނީ، ޔަމަނު ހަނގުރާމާގައި އެ ޖަމާއަތާ ދެކޮޅަށް އަސްކަރީ ކޯލިޝަނެއް ހަދައިގެން އިސްކޮށް އޮވެ، ހަނގުރާމަ ކުރަމުންދާ ސައުދީ އަރަބިއްޔާއަށ ދޭ ހަމަލާތައްވެސް ހުއްޓާލާނެ ކަމަށް ބުނެފައެވެ.
އެކުވެރި އަރަބި އިމާރަތަކީ ސައުދީގެ އަސްކަރީ ކޯލިޝަންގެ އިސް ބައިވެރިއެއް ކަމަށްވާއިރު ގަރްގާޝް ވަނީ، ޔަމަނުގެ މަސްލަހަތާ ގުޅިފައިވާ ހުރިހާ ފަރާތަކުންވެސް ސިޔާސީ ފެންވަރުގެ އެއްބަސްވުމަކަށް ފުރުސަތު ފަހިކުރުމަށް އެއްބާރުލުން ދިނުމަށް ގޮވާލައްވާފައެވެ.
މިމޭރުމުން ވާހަކަފުޅު ދައްކަވަމުން ގަރްގާޝް ވިދާޅުވީ، މިފަދަ އެއްބަސްވުމެއް ވާންޖެހޭ ޔަމަނުގެ ހުރިހާ ގޮތްޕެއްވެސް އެކުލެވޭ އެއްބަސްވުމަކަށް ކަމަށާ، އޭގެ ތެރޭގައި ހޫތީންވެސް ހިމެނެންޖެހޭނެ ކަމަށެވެ. ހޫތީންނަކީ ޔަމަނު ސުންނާފަތިކުރި ހަނގުރާމަވެރިންތަކެއް ތިބި ޖަމާއަތެއް ކަމަށާ، ނަމަވެސް އެއީވެސް ޔަމަނުގެ މުޖުތަމައުގެ ބައެއް ކަމަށް ގަރްގާޝްވަނީ އިއުތިރާފުވެވަޑައިގެންފައެވެ.
ޔަމަނުގެ މައި ސަރުކާރާ، އެ ސަރުކާރަށް އެއްބާރުލުންދޭ ފެކްޝަންތަކާ ދެކޮޅަށް ހޫތީން ވަރުގަދަ ހަނގުރާމައެއް ކުރަމުންދާތާ މިހާރު ވަނީ 4 އަހަރަށްވުރެ ގިނަ ދުވަސްވެފައެވެ. މި ހަނގުރާމާގައި އެތައް ހާށް ބައެއްގެ ފުރާނަ ގެއްލިފައިވާއިރު އެތައް މިލިއަން ބަޔަކު ތިބީ ބަނޑުހައިހޫނުކަމުގެ އަނދަވަޅަކަށް ވެއްޓުމުގެ ތުންފަތް މަތީގައެވެ.
