ރާއްޖެ ސަރަހައްދުގައި އުފެދުނު ކޮޅިގަނޑު އިތުރަށް ބާރުގަދަވެ ތޫފާނަކަށް ބަދަލުވެއްޖެއެވެ. މި ތޫފާނަށް ދީފައިވާ ނަމަކީ “މަހާ” އެވެ.
އިންޑިއާގެ މޫސުމާއި ބެހޭ އިދާރާއިން މީގެ އިރުކޮޅެއް ކުރިން ބުނީ ރާއްޖެ ސަރަހައްދުގައި އުފެދިފައިމިވާ ކޮޅިގަނޑަށް ކުއްލި އަކަށް އައިސްފައިވާ ބަދަލާއެކު ތޫފާނަކަށް ބަދަލުވެދާނެ ކަމަށެވެ. އިންޑިއާގެ މޫސުމާއި ބެހޭ އިދާރާއިން ލަފާ ކުރާ ގޮތުގައި ކުރިއަށް އޮތް 12 ގަޑިއިރުގެ ތެރޭގައި މި ކޮޅިގަނޑު ތޫފާނަކަށް ބަދަލުވާނެއެވެ. އެ ފަރާތުން އަންދާޒާ ކުރަނީ މިރޭ 12:00 ހާއިރު ތޫފާނަކަށް ބަދަލުވާނެ ކަމަށެވެ. ނަމަވެސް އަންދާޒާ ކުރި ވަރަށްވުރެ އަވަހަށް ކޮޅިގަނޑު މިވަނީ ތޫފާނަކަށް ބަދަލުވެފައެވެ.
މި ކޮޅިގަނޑު ތޫފާނަކަށް ބަދަލުވި ނަމަވެސް ރާއްޖެއަށް މާބޮޑު ގެއްލުމެއް ލިބިދާނެ ކަމަކަށް ނުބެލެވެއެވެ. އެއީ މި ކޮޅިގަނޑު ދަތުރުކުރަމުން އަންނަނީ ރާއްޖެއާއި ދުރަށް އަރަބި ކަނޑާއި ދިމާއަށް ކަމަށްވުމުންނެވެ. އެހެންނަމަވެސް ކުރިން އަންދާޒާ ކުރި ވަރަށްވުރެ އަވަހަށް މި ކޮޅިގަނޑު ތޫފާނަކަށް ބަދަލުވެފައިވާތީ ރާއްޖޭގެ އުތުރުގެ އަތޮޅުތަކަށް މޫސުން ވަރަށް ގޯސްވެދާނެ ކަމަށް ލަފާ ކުރެވެއެވެ.
އެގޮތުން މިރެއާ މާދަމާ ވިލާ ބޯވެގެން ދާނެ ކަމަށް ރާއްޖޭގެ މޫސުމާއި ބެހޭ ގައުމީ އިދާރާއިން ވަނީ ލަފާކޮށްފައެވެ. އަދި މެދު ރާއްޖެތެރެއާއި އުތުރު ބޮޑަށް ވިއްސާރަ ކުރާނެ ކަމަށް ބެލެވޭއިރު ދެކުނަށްވެސް ވިއްސާރަ ކުރާނެ ކަމަށް ބެލެވޭ ކަމަށް މޫސުމާއި ބެހޭ ގައުމީ އިދާރާއިން މައުލޫމާތުދެއެވެ.
