އެކި މައްސަލަތަކުގައި ހދ އަދި ހއ އަތޮޅުން ފުލުހުންގެ ބެލުމުގެ ދަށަށް ގެންގޮސްފައި ހުރި 600 އަށް ވުރެން ގިނަ ބަނގުރާ ނައްތާލައިފިއެވެ.
ފުލުހުން ބުނީ މިއަދު ހެނދުނު 10:00 އިން ފެށިގެން ކުރިއަށްދިޔަ މި މަސައްކަތުގައި ނައްތާލާފައި ވަނީ 642 ބްރޭންޑެޑް ބަނގުރާ ފުޅި އާއި ފަސް ބްރޭންޑެޑް ބަނގުރާ ދަޅު ކަމަށެވެ. އަދި މީގެތެރޭގައި 288 ބްރޭންޑްގެ ބަނގުރާ ހިމެނޭ ކަމަށް ފުލުހުން ބުނެއެވެ.
ބަނގުރާ ނައްތާލުން ކުރިއަށް ގެންގޮސްފައި ވަނީ ފުލުހުންގެ ބެލުމުގެ ދަށަށް ގެނެވޭ ބަނގުރަލާއި ބަނގުރަލުގެ މައްސަލަތަކާއި ގުޅިގެން ހިފެހެއްޓޭ ތަކެތި ނައްތައިލުމުގައި އަމަލުކުރާނެ ގޮތުގެ ޤަވާއިދުގެ ދަށުން އެކަމަށްޓަކައި އެކުލަވައިލި ކޮމިޓީގެ ބެލުމުގެ ދަށުންނެވެ.
ދާދި ފަހުންވެސް އދ. މާމިގިލީ ޕޮލިސް ސްޓޭޝަންގެ ބެލުމުގެ ދަށުގައި ހުރި ގިނަ އަދަދެއްގެ ބަނގުރާ ފުޅިތައް ނައްތާލާފައިވާއިރު، ހަމަ މި މަސްތެރޭގަ ކަސްޓަމްސްގެ ބެލުމުގެ ދަށުގައި ހުރި ގިނަ އަދަދެއްގެ ބަނގުރަލާއި ޖިންސީ އެދުން ފުއްދުމަށް ބޭނުންކުރާ ބޭސްތަކެއް ނައްތާލައިފައި ވެއެވެ.
