މި އަހަރުގެ ކިޔެވުން ނިންމާފައި ދަރިވަރު ނުކުންނާނީ ފޮތް ލިސްޓާ އެއްކޮށް ކަމަށް އެޑިއުކޭޝަން މިނިސްޓްރީގެ ސްޓްޓް މިނިސްޓަރު އަހުމަދު ރިޔާޒް ވިދާޅުވެއްޖެއެވެ.
"ދަ ޕްރެސް" އަށް މައުލޫމާތު ދެއްވަމުން އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ވިދާޅުވީ، މިހާރު ރާއްޛޭގެ ސްކޫލުތަކުގައި ކިޔަވަމުންދާ ދަރިވަރުންނަށް ބޭނުންވާ ފޮތްތަކުގެ 95 އިންސައްތަ ވަނީ ގެނެސް ގުދަން ކުރެވިފައި ކަމަށެވެ. އަދި މިދިޔަ ބުދަ ދުވަހުން ފެށިގެން ފޮތްތައް ސްކޫލުތަކާއި ހަވާލު ކުރަމުންދާ ކަމަށް ރިޔާޒު ވިދާޅުވިއެވެ.
މީގެ އިތުރުން ރިޔާޒު ވިދާޅުވީ، މި އަހަރު ފޮތްތައް ލިބުމުގައި ދިމާވި ދަތި އަންނަ އަހަރު ދިމާ ނުވާނެ ކަމަށް އުންމީދު ކުރައްވާ ކަމަށާއި ހުރިހާ ކުދިންނަށްވެސް މި އަހަރުގެ ކިޔެވުން ނިމޭ ދުވަހު ގެއަށް ދާނީ ފޮތް ލިސްޓް ހިފައިގެން ކަމަށެވެ.
އެޑިއުކޭޝަން މިނިސްޓްރީން މިއަދު ކުރި ތްވީޓެއްގައި ވަނީ، އަންނަ އަހަރު ސްކޫލްތަކުގައި ކިޔަވާ ދަރިވަރުންނަށް ބޭނުންވާ ފޮތްތައް ފޮނުވުމުގެ މަސައްކަތް މިހާރު ފަށާފައިވާ ކަމަށެވެ. އަދި މި އަހަރުގެ ކިޔެވުން ނިމޭ އިރު، ކުދިންނަށް ރިޕޯޓު ކާޑް ހަވާލުކުރާ ދުވަހު އެ ކުދިންނަށް ފޮތްތައް ހަވާލު ކުރުމަކީ އެ މިނިސްޓްރީގެ އުންމީދެއް ކަމަށެވެ.
ރިޔާޒު ވިދާޅުވީ، ބުދަ ދުވަހުން ފެށިގެން ސްކޫލްތަކަށް ފޮތްތައް ފޮނުވުމުގެ މަސައްކަތް ފަށާފައިވާ ކަމަށެވެ. އެގޮތުން ސްކޫލްތައް ބަންދު ވާން ވާއިރަށް ހަމައަށް ހުރިހާ ސްކޫލްތަކަކަށް ފޮތްތައް ފޮނުވާ ނިމޭނެކަމަށް ލަފާ ކުރާ ކަމަށެވެ.
މި އަހަރުގެ ފަހު ޓާމްގެ ރިޕޯޓް ފޯމް ދޫކުރާ ދުވަހަކީ އަންނަ މަހުގެ 21 ވަނަ ދުވަހެވެ. އެކަޑެމިކް ކަލަންޑަރު ދައްކާ ގޮތުން 2020 ވަނަ އަހަރުގެ ކިޔެވުން ފެށޭނީ އަންނަ ޖެނުއަރީ މަހުގެ 12 ވަނަ ދުވަހެވެ.
2019 ވަނަ އަހަރުގެ ކިޔެވުން ފެށުނު އިރު ގިނަ އަދަދެއްގެ ކުދިންނަށް ޓެކްޓް ފޮތްތައް ނުލިބޭ މައްސަލަ ވަނީ ފެންމަތިވެފައެވެ. ސްކޫލުގެ ކިޔެވުން ފެށުނު އިރުވެސް ގިނައަދަދެއްގެ ކުދިންނަށް ފޮތްތައް ނުލިބޭތީ އެތައް ބެލެނިވެރިންނެއް ވަނީ ޝަކުވާ ކޮށްފައެވެ.
