މިއަދު ހ. އަންނާރުމާގޭގައި މަރުވެފައި އޮއްވާ ފެނުނު މީހާ އަށް އަނިޔާކޮށްފައި ވާ ކަމަށް ނުބެލެވޭ ކަމަށް ފުލުހުން ބުނެފިއެވެ.
ފުލުހުން ބުނީ އެ ގޭގައި ނިދާފައި އޮތް މީހެއްގެ ހަބަރެއް ނުވެގެން ބެލިއިރު މަރުވެފައި އޮތް މައްސަލައެއް މިއަދު ހެނދުނު 10:24 ހާއިރު ފުލުހަށް ހުށަހެޅި ކަމަށެވެ.
އެގޮތުން މި މައްސަލައިގެ ތަހުގީގުގައި މިހާތަނަށް ބެލި ބެލުމުން، މަރުވި މީހާގެ އަނގައިގެން ފޮނު އައިސްފައި ވާކަން ފާހަގަ ކުރެވިފައި ވާ ކަމަށާއި އަދި އޭނާގެ ނިތްކުރީގައި ތިލަކޮށް ކަނޑައިގެން ގޮސްފައި ވާކަން ވެސް ފާހަގަ ކުރެވިފައި ވާ ކަމަށް ފުލުހުން ބުންޏެވެ.
ފުލުހުން ބުނީ އޭނާގެ ނިތްކުރީގައި އަނިޔާއެއް ހުރިކަމަށާ އަނިޔާ އަކީ މީހެއްގެ ފުރާނައަށް ގެއްލުންވާ ވަރުގެ އަނިޔާއެއް ނޫންކަން ފާހަގަ ކުރެވިފައި ވާ ކަމަށެވެ. މި ހާދިސާއާ ގުޅިގެން އިތުރަށް ބަލާ ފާސްކުރަންޖެހޭ ކަންކަން ސާފުކޮށް މި ހާދިސާ ފުލުހުން ދަނީ ތަހުގީގު ކުރަމުން ކަމަށެވެ.
މިއަދު ހެނދުނު މަރުވީ ޒުވާނާގެ އުމުރަކީ 28 އަހަރެވެ. މަރުވެފައި ވަނީ ހުސައިން ހިޝާމް ރަޝީދު ނަމަކަށް ކިޔާ ޒުވާނެކެވެ. އޭނާއަކީ ޔާމީން ރަޝީދު މަރާލި މައްސަލައިގައި ތޫނު އެއްޗެއް ބޭނުންކޮށްގެން މީހަކު މަރާލާފައިވާ ކަމުގެ ދައުވާ އުފުލާފައިވާ އިސްމާއިލް ހައިޝަމް ރަޝީދުގެ ބޭބެއެވެ. އާއިލާއާއި ހަވާލާދީ ބައެއް ފަރާތްތަކުން ބުނެފައި ވަނީ ހިޝާމް މަރުވެފައި ވަނީ ފިޓު ޖެހިގެންނެވެ.
އޭނާ މަރުވެފައި މިވަނީ ޔާމީން ރަޝީދުގެ މަރުގެ މައްސަލާގައި ދައުލަތުން ހުށަހަޅަން ބޭނުންވާ ހެކިންނަށް ބިރު ދައްކައި ޖިސްމާނީ އަނިޔާ ކުރާނެ ކަމުގެ އިންޒާރު ދެމުންދާ ކަމަށް، އިއްޔެ ބޭއްވި ޝަރީއަތުގެ އަޑުއެހުމެއްގައި ފުލުހުން ބުނެފައި ވަނިކޮށެވެ.
ހިޝާމުގެ މައްޗަށް ކަށުނަމާދުކޮށް ވަޅުލީ މިރޭ އިޝާ ނަމާދަށް ފަހުއެވެ.
