އުރީދޫއިން ކޭބަލެއް މަރާމާތު ކުރުމުގެ މަސައްކަތެއް ކުރިއަށް ގެންދާތީ މާދަމާ ރޭ އުރީދޫގެ އިންޓަނެޓު ހިދުމަތަށް ބުރޫ އެރުމަކީ އެކަށީގެންވާ ކަމެއް ކަމަށް އެ ކުންފުނިން ބުނެފިއެވެ.
އުރީދޫއިން ބުނީ އެ ކުންފިނީގެ އިންޓަނޭޝަނަލް ސަޕްލަޔަރު ހިންގުމަށް ހަމަޖެހިފައިވާ މުހިންމު ކޭބަލް މަރާމާތުކުރުމުގެ މަސައްކަތަކާއި ގުޅިގެން، 13 އޮކްޓޯބަރު ވާ އާދީއްތަ ވިލޭރޭ ދަންވަރު 3.00 ފެށިގެން ރޭގަނޑު 11.00ގެ ނިޔަލަށް، އުރީދޫގެ އިންޓަނެޓް ހިދުމަތްތައް ބޭނުން ކުރުމުގައި ދަތިތަކެއް ދިމާވުން އެކަށީގެންވާ ކަމަށެވެ.
އެ މަސައްކަތް ކުރިއަށްދާ ވަގުތު، އުރީދޫ ކަސްޓަމަރުންނަށް ދިމާވެދާނެ ދަތިތައް ވީހާވެސް ކުޑަކޮށް، ވީހާވެސް އަވަހަށް މަސައްކަތް ފުރިހަމަ ކުރުމަށްޓަކައި އުރީދޫގެ ޓީމްތައް މަސައްކަތް ކުރަމުން ދާނެ ކަމަށް ވެސް އެކުންފުނިން ބުންޏެވެ.
ނަމަވެސް އެ މަސައްކަތް ކުރާއިރު ކަސްޓަމަރުންނަށް ދިމާވެދާނެ ދަތިތަކަށް މައާފަށް އެދޭ ކަމަށް އުރީދޫއިން ބުންޏެވެ.
