ޓީ ޖެޓީ ސަރަހައްދުގައި އޮތް ލޯންޗެއްގައި ރޯވެ، އަލިފާންގަނޑު ފެތުރި އެ ސަރަހައްދުގައި އޮތް 4 ތެޔޮ ބައުޒަރުގައި ރޯވެ އަލިފާނުގެ ހާދިސާއެއް ވަނީ ހިނގާފައެވެ.
މި ހާދިސާ ހިނގާފައިވަނީ މިއަދު ހަވީރު 3:40 ހާއިރު ކަމަށް ފުލުހުން މައުލޫމާތުދެއެވެ. މިހާދިސާގައި 9 މީހަކަށް އަނިޔާވުމުގެ ސަބަބުން އައިޖީއެމްއެޗްގައި ދަނީ ފަރުވާ ދެމުންނެވެ. އަދި އޭގެ ތެރެއިން 2 މީހަކު އޮތީ ސީރިއަސް ހާލަތުގައި ކަމަށް ވެސް މައުލޫމާތުލިބެއެވެ. އަނިޔާވި މީހުންގެ ތެރޭގައި ހިމެނެނީ 7 ދިވެހިންނާއި 2 ބިދޭސީންނެވެ.
ޓީ ޖެޓީ އަކީ މުދާ އުފުލާ ދޯނިފަހަރާއި ދަތުރުދަތުރުކުރާ ލޯންޗު ފަހަރުގެ އިތުރުން ތެޔޮ ބައުޒަރުތައް ވެސް ވަރަށް ގިނައިން ބޭނުންކުރާ ސަރަހައްދެކެވެ. މި ސަރަހައްދަކީ އާންމުން ދިރިއުޅޭ ސަރަހައްދަކަށް ނުވިއަސް، އަލިފާން ރޯވެ، ދުން އަރަން ފެށުމުން ގިނަ އަދަދެއްގެ އާންމުން ވަނީ އެ ސަރަހައްދަށް އެއްވެފައެވެ.
މި ސަރަހއްދުގައި ހަރަކާތްތެރިވި 'ދަ ޕްރެސް' ގެ ނޫސްވެރިން މައުލޫމާތުދޭ ގޮތުގައި، އެ ސަރަހައްދުގައި އޮތް ތެޔޮ ބައުޒަރަކަށް އަލިފާން ފެތުރުމާ އެކު، އެ ސަރަހައްދަށް ޖަމާވި އާންމުންނާއި ފުލުހުން އަދި ސިފައިން ވަނީ އެ ސަރަހައްދުގައި ޕާކް ކޮށްފައި ހުރި ވެހިކަލްތަކާއި، ބައުޒަރުތައް ވަގުތީ ގޮތުން އެހެން ތަނަކަށް ބަދަލުކޮށްފައެވެ. އަދި އެ ސަރަހައްދުގައި ބަނދަރުކޮށްފައި އޮތް އުޅަނދުތައް ވެސް ވަނީ ފަޅުން ބޭރުކޮށްފައެވެ. މީގެ އިތުރުން، އެ ސަރަހައްދުގައި ހަރަކާތްތެރިވަމުން ދިޔަ 'ދަ ޕްރެސް' ގެ ނޫސްވެރިންނަށް ވަނީ ހާދިސާގައި ފިހިގެން ބައެއް މީހުން ހޮސްޕިޓަލަށް ގެންދިޔަ މަންޒަރު ފެނިފައެވެ. އެގޮތުން ބައެއް މީހުންގެ ހަށިގަނޑުގެ ބޮޑުބައެއް ފިހިފައިވާ ކަމަށް ނޫސްވެރިން މައުލޫމާތުދެއެވެ.
މަންޒަރު ދުށް މީހުންނާއި ހަވާލާދީ ބައެއް މީޑިއާތަކުން ރިޕޯޓް ކޮށްފައިވާ ގޮތުގައި، ލޯންޗުގައި އަލިފާން ރޯވީ ބައުޒަރުން ލޯންޗަށް ޕެޓްރޯލް އަޅަން އުޅުމުގެ ތެރޭގައި ބައުޒަރުގެ ހޮޅީގައި ރޯވެގެންނެވެ. އަދި އަލިފާން ރޯވުމަށް މެދުވެރިވި ސަބަބަކީ ތެޔޮ އެޅި ތަނުގައި ސިނގިރެޓް ބުއިމުން ކަމަށް ވެސް ބައެއް މީޑިއާތަކުން ރިޕޯޓް ކޮށްފައި ވެއެވެ.
އަލިފާން ރޯވިތާ ގާތްގަނޑަކަށް ދޮޅު ގަޑިއިރު ތެރޭގައި އަލިފާން ނިއްވާލާފައި ވާއިރު، ޓީ ޖެޓީ ސަރަހައްދުގައި ހުރި ތެޔޮ ބައުޒަރުތައް އެހެން ސަރަހައްދުތަކަށް ގެންދެވިފައި ވިޔަސް އެތަކެތި ބަލަހައްޓާނެ މީހަކު ނެތި، ޕާކް ކޮށްފައި ނުބޭއްވުމަށް އެމްއެންޑީއެފް އިން ވަނީ އިލްތިމާސް ކޮށްފައެވެ.
މީގެ އިތުރުން، ރައީސް އިބްރާހިމް މުހައްމަދު ސޯލިހް އަދި ޑިފެންސް މިނިސްޓަރު މާރިޔާ އަހްމަދު ދީދީގެ އިތުރުން ހޯމް މިނިސްޓާ އިމްރާން އަބްދުﷲ ވެސް ވަނީ ޓީ ޖެޓީ ސަރަހައްދަށް ޒިޔާރަތް ކުރައްވައިފައެވެ. އެގޮތުން، ރައީސް ވަނީ، އެ ސަރަހައްދުގައި ހަރަކާތްތެރިވި ސިފައިންނާއި ބައްދަލުކުރައްވާ، މައުލޫމާތު ސާފު ކުރައްވާ އަލިފާން ކޮންޓްރޯލް ކުރަން ސިފައިން ކުރި މަސައްކަތަށް ތައުރީފު ކުރައްވާފައެވެ. ރަައީސް ވިދާޅުވީ މިއަދުގެ އެ އަލިފާނުގެ ހާދިސާ ހިނގާފައިވަނީ ނުރައްކާތެރި ހާދިސާތައް ހިނގުމުގެ ފުުރުސަތު ބޮޑު ސަރަހައްދެއްގައި ކަމަށާއި، ރޯވި އަލިފާންގަނޑު ކޮންޓްރޯލް ކުރަން ސިފައިންނާއި ފުލުހުން ކޮށްފައިވަނީ ތައުރީފު ހައްގު މަސައްކަތެއް ކަމަށެވެ. އެ މަސައްކަތް އެގޮތަށް ނުުކުރެވުނަމަ އަލިފާނުގެ ބޮޑު "ކާރިސާ" އަކަށް ހާދިސާ ބަދަލުވެގެންދާނެ ކަމަށެވެ.
މި ހާދިސާއާ ގުޅިގެން މިނިސްޓަރު އިމްރާން ވަބީ މިފަދަ ނުރައްކާތެރި ހާދިސާތައް ހިނގައި ނުދިއުމަށް ގާނޫނުތަކަށް ހުރުމަތްތެރިކޮށް ހިތުމާ އެކު ސަލާމަތީ ކަންކަމަށް ހުރިހާ ފަރާތްތަކުން ސަމާލުކަން ދެއްވުމަށް އިލްތިމާސް ކުރައްވާފައެވެ.
މިހާދިސާގައި 4 ބައުޒަރާއި ލޯންޗެއްގައި ރޯވެފައިވާއިރު، އަލިފާން ރޯވި ލޯންޗު ވަނީ ބޭނުން ނުކުރެވޭ ވަރަށް އަނދައި، ލިބުނު ގެއްލުމުގެ ސަބަބުން ފަޅުތެރެއަށް އަޑިއަށް ގޮސްފައެވެ. އަލިފާން ރޯވެ، ބޭނުންނުކުރެވޭ ވަރަށް ހަލާކުވެ، އަޑިއަށް ގޮސްފައިވަނީ އއ. އުކުޅަސް ސްކޫލުގެ ޕްރިންސިޕަލްގެ "ނެވި 3" ނަމަކަށް ކިޔާ ސްޕީޑް ލޯންޗެއްގައެވެ.
