ދިވެހިރާއްޖެއާއި ސައުދީ އަރަބިއްޔާއާއި ދެމެދު އޮންނަނީ އެކުވެރި ގުޅުމެއް ކަމަށާ، ކުރިޔަށް އޮތް ދުވަސްތަކުގައި އެކި ދާއިރާތަކުން މިގުޅުން ބަދަހިވާނެކަމަށް އުންމީދު ކުރައްވާކަމަށް ސައުދީ އަރަބިއްޔާގެ ހާރިޖީ ވަޒީރު އިބްރާހީމް ބިން ޢަބްދުލްޢަޒީޒް އާލް-އައްސާފް ވިދާޅުވެއްޖެއެވެ.
ސައުދީގެ ހާރިޖީ ވަޒީރު މިފަދަ މޭރުމަކުން ވާހަކަފުޅު ދައްކަވާފައި މިވަނީ، އެމެރިކާގެ ނިއު ޔޯކްގައި މިހާރު ކުރިއަށްދާ އދގެ މެމްބަރު ގައުމުތަކުގެ 74 ވަނަ އާންމު މަޖިލިހުގެ ހަވާސާގައި، ދިވެހިރާއްޖޭގެ ރައީސުލްޖުމްހޫރިއްޔާ އިބްރާހީމް މުޙައްމަދު ސޯލިހުއާއި ބައްދަލުކުރައްވާ ވާހަކަފުޅުދައްކަވަމުންނެވެ.
މި ބައްދަލުކުރެއްވުމުގައި، 2 ގައުމު ގުޅިގެން ކުރިޔަށް އޮތް ދުވަސްތަކުގައި ކުރުމަށް ހަމަޖެހިފައިވާ މަސައްކަތްތަކުގެ މައްޗަށް ވަނީ އަލިއަޅުއްވާލައްވާފައެވެ. މިގޮތުން ދެބޭފުޅުން ވަނީ ރާއްޖޭގެ އުމްރާނީ، އިގުތިސޯދީ ތަރައްގީގެ މަޝްރޫއުތަކާ، ސަރަހައްދީ އަދި ބައިނަލްއަގުވާމީ ވިޔަފާރިޔާ ބެހޭގޮތުން ފުޅާ ދާއިރާއެއްގައި މަޝްވަރާކުރައްވާފައެވެ.
މި ބައްދަލުވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާވަނީ ރިޔާދާއި ޖިއްދާއާއި މާލެއާއި ދެމެދު ގާއިމްކޮށްފައިވާ ސީދާ ވައިގެ ގުޅުންތަކަށް އަލިއަޅުއްވާލައްވައި، މިއީ 2 ގައުމުގެ ދެމެދުގައި އޮތް ގުޅުން، އަދި 2 ގައުމުގެ ރައްޔިތުންގެ މެދުގައި އޮތް ގުޅުން، އިތުރަށް ބަދަހިވެގެންދާނެ ކަމެއްކަން ފާހަގަކުރައްވާފައެވެ. މީގެ އިތުރުން، ޖިއްދާގައި ރާއްޖޭގެ ކޮންސިއުލޭޓެއް ހުޅުވުމާއި، ސައުދީއަށް ދަތުރުކުރާ ދިވެހީންނަށް ވިސާގެ ކަންތައްތައް ލުއިފަސޭހަ ކޮށްދިނުމާއި ބެހޭގޮތުންވެސް ދެ ބޭފުޅުން މަޝްވަރާ ކުރައްވާފައިވެއެވެ.
މީގެ އިތުރުންވެސް ރައީސުލްޖުމްހޫރިއްޔާއާއި ސައުދީގެ ހާރިޖީ ވަޒީރު ވަނީ ދެގައުއުމުގެ ގުޅުން އިތުރަށް ބަދަހިކުރެވޭނެ ދާއިރާތަކާއި ބެހޭގޮތުން މަޝްވަރާކުރައްވާފައެވެ.
ދިވެހިރާއްޖެއާއި ސައުދީ އަރަބިއްޔާއާއި ދެމެދު ޑިޕްލޮމެޓިކް ގުޅުން ގާއިމުކޮށްފައިވަނީ މީލާދީން 1981 ވަނަ އަހަރުގެ ތެރޭގައެވެ. އަދި ދިވެހިރާއްޖެއިން މެދުއިރުމަތީގައި ހުޅުވި ފުރަތަމަ މިޝަންގެ ގޮތުގައި ސައުދީގެ ވެރިރަށް ރިޔާދުގައި ދިވެހިރާއްޖޭގެ އެމްބަސީއެއް 2008 ވަނަ އަހަރުގެ މެއި މަހުގެ 12 ވަނަ ދުވަހު ވަނީ ހުޅުވާފައެވެ.
