މިއަދު ފަށާ އދގެ މެމްބަރު ގައުމުތަކުގެ އިސްވެރިންގެ ބައްދަލުވުމުގައި ދިވެހިރާއްޖޭގެ ރައީސުލްޖުމްހޫރިއްޔާ އިބްރާހީމް މުޙައްމަދު ސޯލިހު ތަގުރީރުކުރައްވާނެއެވެ.
ރާއްޖެ ގަޑިން ހަވީރު 06:00 ގައި ފެށުމަށް ހަމަޖެހިފައިވާ އދގެ މެމެބަރު ގައުމުގެ އިސްވެރިންގެ އާންމު ބަހުސް ނުވަތަ ޔޫއެން ޖެނެރަލް ޑިބޭޓްގެ ފުރަތަމަ ދަންފަޅީގައި ރައީސް ސޯލިހު ތަގުރީރުކުރައްވަން ހަމަޖެހިފައިވަނީ 6 ވަނަ އަށެވެ. އދގެ އާންމު ބަހުސްގެ އެޖެންޑާ ރޭވިފައިވާ ގޮތަށް ބަލާއިރު އެންމެ ފުރަތަމަ ވާހަކަ ދައްކާނީ ބްރެޒީލްއެވެ. އާންމު ބަހުސްގައި ފުރަތަމަ ތަގުރީރުކުރުމުގެ ޝަރަފު ބްރެޒީލްއަށް އޮންނަތާ އަހަރުތަކެއްވެއްޖެއެވެ. އެއީ އދގެ އާންމު ބަހުސް ފެށިގެން އައި ދުވަސްވަރު، ބްރެޒީލް ފިޔަވާ އެހެން ގައުމަކުން ފުރަތަމަ ވާހަކަ ދެއްކުމަށް އިސްނަގާފައި ނުވާތީ ބްރެޒީލްއަށް ދީފައިވާ ޝަރަފެކެވެ. ބްރެޒީލްއަށްފަހު މި ދަންފަޅީގައި ދެން ތަގުރީރުކުރާނި ބައްދަލުވުން ހޮސްޓްކުރާ ގައުމުގެ ހައިސިއްޔަތުން އެމެރިކާއިންނެވެ.
އދގެ އަންމު ބަހުސްގެ އެޖެންޑާގައި ގައުމުތަކުން ވާހަކަ ދައްކާނެ ތާވަލު ދެން ބަހާލެވިގެން ދަނީ އެ ގައުމަކުން އެ ބައްދަލުވުމުގައި ތަގުރީރުކުރައްވާ ބޭފުޅެއްގެ ހައިސިއްޔަތާ ޖިއޮގްރަފިކަލް ބެލެންސްފަދަ ކަންކަމަށް ބެލުމަށްފަހުގައެވެ. އެހެންކަމުން، އދގެ އާންމު ބަހުސްގެ ފުރަތަމަ ދަންފަޅީގެ ފުރަތަމަ 10 އިން ދިވެހިރާއްޖެއަށް ފުރުސަތު ލިބުމަކީވެސް ޝަރަފެކެވެ. ކޮންމެ ގައުމަކަށްވެސް 15 މިނެޓްގެ ވަގުތުކޮޅެއް މި ބަހުސްގައި ލިބޭއިރު، އެއަށްވުރެ އިތުރަށް ވަގުތު ބޭނުންކުރުމުގެ ފުރުސަތުވެސް އޮވެއެވެ.
މިއަދު ފަށާ އދގެ މެމްބަރު ގައުމުތަކުގެ އިސްވެރިންގެ ބައްދަލުވުމުގެ އާންމު ބަހުސްގައި ރައީސް ސޯލިހު ތަގުރީރުކުރައްވާއިރު، މިއީ ފާއިތުވީ 7 އަހަރު ދުވަހުގެ ތެރޭގައި ދިވެހިރާއްޖޭގެ ފަރާތުން ގައުމުގެ އެންމެ އިސްވެރިޔާ މި ޕޯޑިއަމްގައި ތަގުރީރުކުރައްވާ ފުރަތަމަ ފަހަރެވެ. މި ތަގުރީރު ކުރިއަށްދާނީ އެމެރިކާގެ ނިއު ޔޯކްގައި ހުންނަ އދގެ މައި އިދާރާގެ އާންމު ޖަލްސާ މާލަމުގައެވެ.
