ރާއްޖެއަކީ ބައިނަލްއަގްވާމީ މުޖުތަމައުގެ މެންބަރަކަށް ވީތީ އުފާފުޅު ކުރައްވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިފަދައިން ވިދާޅުވީ، ރައީސް އިބްރާހިމް މުހައްމަދު ސޯލިހް އދ ގައި ތަގުރީރު ކުރައްވަން ވަޑައިގަތުމާ ގުޅިގެން އެމަނިކުފާނަށް މަރުހަބާ ދެއްނެވުމަށް ކުރެއްވި ޓްވީޓެއްގައެވެ. ނަޝީދު ވިދާޅުވީ ރާއްޖެއަކީ ބައިނަލްއަގްވާމީ މުޖުތަމައުގައި އިއްޒަތްތެރި މެންބަރަކަށް ވުމުންނާއި، ބައިނަލްއަގްވާމީ މަސްރަހުގައި ރާއްޖޭގެ އަޑު އިއްވުމަކީ އުފފުޅު ކުރައްވާ ކަމެއް ކަމަށެވެ.
އދގެ 74 ވަނަ އާންމު މަޖިލީހުގައި ތަގުރީރު ކުރެއްވުމަށް ރައީސް ސޯލިހް އެމެރިކާއަށް ރަސްމީ ދަތުރުފުޅެއްގައި ފުރާވަޑައިގެންނެވީ އިއްޔެއެވެ. އިއްޔެ އަކީ އދގެ މެންބަރަކަށް ރާއްޖެ ވީތާ 54 އަހަރު ފުރޭ ދުވަހަށް ވީއިރު މިއީ، ފާއިތުވި ހަތް އަހަރުގެ ތެރޭގައި ދިވެހިރާއްޖޭ ރައީސްކަން ކުރެއްވެވި ބޭފުޅަކު އދގެ އާންމު މަޖިލީހުގައި ތަގުރީރު ކުރައްވާ ފުރަތަމަ ފަހަރެވެ. އެގޮތުން ދިވެހިރާއްޖެއިން އދގެ މެންބަރަކަށް ވެފައި ވަނީ 21 ސެޕްޓެމްބަރު 1965 ގައެވެ.
ރައީސްގެ މި ދަތުރުފުޅުގައި، އދގެ އާންމު މަޖިލީހުގައި ބައިވެރިވެ ވަޑައިގެންނެވުމަށް އެމެރިކާގެ ނިއު ޔޯކަށް ވަޑައިގަންނަވާ އެކި ގައުމުތަކުގެ ވެރިންނާއި، އދގެ އެކި ޖަމާއަތްތަކުގެ އިސް ބޭފުޅުންނާވެސް ރައީސް ބައްދަލުކުރައްވާނެއެވެ. އދގެ 74 ވަނަ އާންމު މަޖިލީހުގައި ރައީސް ތަގުރީރު ކުރެއްވުމަށް ހަމަޖެހިފައިވަނީ 24 ސެޕްޓެމްބަރު 2019 ގައެވެ.
74 ވަނަ ޔޫއެންޖީއޭ އެޖެންޑާގައި ހިމެނޭ މައިގަނޑު ބައެއް ކަންކަމުގެ ތެރޭގައި ކްލައިމެޓް ސަމިޓްއާއި، ފައިނޭންސިންގް ފޯ ޑިވެލޮޕްމަންޓް ސަމިޓާއި ސަމޯއާ ޕާތްވޭގެ ރިވިއު ބައްދަލުވުން ހިމެނެއެވެ. ގައުމުތަކުގެ އިސްވެރިންގެ ބައްދަލުވުން ފަށާނީ މިމަހުގެ 24 ވަނަ ދުވަހުއެވެ. އިސްވެރިންގެ ބައްދަލުވުމުގައި، ދިވެހިރާއްޖޭގެ ފަރާތުން ތަގުރީރު ކުރައްވާނީ ރައީސް އިބްރާހިމް މުހައްމަދު ސޯލިހުއެވެ.
އދގެ މެންބަރު ގައުމުތަކުގެ 74 ވަނަ އާންމުޖަލްސާ ނިންމާލުމަށް ހަމަޖެހިފައިވަނީ މިމަހުގެ 30 ވަނަ ދުވަހުއެވެ.
