ސައުދީ އަރަބިއްޔާގެ ދެކުނުގެ ސަރަހައްދުގައި އޮންނަ އަބްހާ ބައިނަލްއަގުވާމީ ވައިގެ ބަނދަރަށް އަމާޒުކޮށް، ޔަމަނުގައި ހަނގުރާމަ ކުރަމުންދާ ހޫތީން، 2 ޑްރޯން ހަމަލާއެއް ދީފިއެވެ.
ހޫތީންނާ ދެކޮޅަށް ޔަމަނުގައި ހަނގުރާމަ ކުރަމުންދާ ސައުދީގެ އަސްކަރީ ކޯލިޝަނުގެ ތަރުޖަމާނަކު މިއަދު ހެނދުނު ވިދާޅުވީ، އަބްހާ އެއާޕޯޓަށް އަމާޒުކޮށް ހޫތީން ފޮނުވާލި 2 ޑްރޯން އަށްވެސް ހުރަސް އަޅާ، އެ ހަމަލާތައް ފެއިލްކޮށްލާފައިވާނެ ކަމަށެވެ.
ހޫތީންގެ ޚަބަރުތައް ގެނެސްދޭ އަލް މަސީރާ ޓީވީގެ ޓްވިޓާ ފީޑްގައިވާ މައުލޫމާތަށް ބަލާއިރު، ހޫތީންގެ ހަމަލާ އަމާޒުކޮށްފައިވަނީ އަބްހާ އެއާޕޯޓްގެ މޮނިޓަރިންގެ ޓަވަރަށާ، ސައުދީ އަރަބިއްޔާގެ މުހިންމު އެހެން ހިސާބުތަކަށް ކަމަށް ހޫތީންގެ "އަސްކަރީ" ތަރުޖަމާނު ޔަޙްޔާ ސާރިޔާ ވަނީ ބުނެފައެވެ. އަދި ހޫތީންގެ ހަމަލާތަކުގެ ސަބަބުން، ސައުދީގެ ވައިގެ އުދުހުންތަކަށް ބުރޫ އެރިކަމަށްވެސް އޭނާ ވަނީ ބުނެފައެވެ.
ނިމިގެންދިޔަ ހަފުތާގެ ކުރީކޮޅުގައިވެސް ހޫތީންވަނީ ސައުދީ އަރަބިއްޔާގެ ވައިގެ ބަނދަރުތަކަކަށް ހަމަލާ އަމާޒުކޮށްފައެވެ.
ޔަމަނުގެ ކޮންޓްރޯލް ނެގުމަށް ހަނގުރާމަ ކުރަމުންދާ ހޫތީ ހަނގުރާމަވަވެރިންނާ ދެކޮޅަށް، ސައުދީއާއި އެކުވެރި އަރަބި އިމާރާތް އިސްވެއޮވެގެން އެކުލަވާލި އަސްކަރީ ކޯލިޝަނުން ހަމަލާދޭން ފަށާފައިވަނީ 2015 ވަނަ އަހަރުގެ މާޗްމަހުގެ ތެރޭގައެވެ. އޭގެ ފަހުން މި ހަމަލާ ބަދަލުކުރުންތަކަށް ހުއްޓުމެއް އައިސްފައިނުވާއިރު، ޔަމަނުގެ ސަރަހައްދީ އިން ހުރަސްކޮށް ހޫތީއިން ފޮނުވާ މިސައިލްއާއި ޑްރޯންތައް ހަމަލާތައް ވަނީ، މި ފަހަކަށް އައިސް ވަރުގަދަކޮށް، އިތުރު ކޮށްފައެވެ.
