ކުރީގެ ނައިބު ރައީސް އަހުމަދު އަދީބު ވަގަށް އިންޑިޔާއަށް އެތެރެވާން އުޅުއްވަނިކޮށް، އެގައުމުގެ ސަލާމާތީ ބާރުތަކުން ހިފަހައްޓައި، އެމަނިކުފާނު ރާއްޖެއަށް އަނބުރާ ފޮނުވާލުމުން މިހާރުވަނީ ފުލުހުންގެ ބެލުމުގެ ދަށުގައި ކަމަށް ފުލުހުންގެ މުއައްސަސާއިން ބުނެފިއެވެ.
މިދިޔަ ބުރާސްފަތި ދުވަހު ޓަގު ބޯޓެއްގައި ދަތުރުކުރައްވައި ގަވާއިދާއި ހިލާފަށް އިންޑިޔާއަށް އެތެރެވާން އުޅުއްވަނިކޮށް ކުރީގެ ނައިބު ރައީސް އަހުމަދު އަދީބު ހިފަހެއްޓި އިރު އެމަނިކުފާނު ވަނީ އިންޑިޔާގެ ސިޔާސީ ހިމާޔަތަށް އެދިވަޑައިގެންފައެވެ. އަދީބު ބައިނަލްއަގްވާމީ ވަކީލުންގެ ޓީމް މެދުވެރިކޮށް އާއްމުކުރި ބަޔާނެއްގައި ބުނެފައިވަނީ، ރާއްޖޭގައި ހުންނަވައިފި ނަމަ އެމަނިކުފާނު ފުރާނައަށް ނުރައްކާވާނެ ކަމަށެވެ. އެގޮތުން އަދީބު ވަނީ އިންޑިޔާގެ ހިމާޔަތަށްވެސް އެދިވަޑައިގެންފައެވެ.
ފުލުހުން ކުރި ޓުވީޓެއްގައި ބުނެފައިވަނީ އަދީބު މިހާރު ހުންނެވީ ފުލުހުންގެ ބެލުމުގެ ދަށުގައި ކަމަށާއި، އަދީބު މާލޭ ގެނައުމަށް ދަތުރުކުރަމުން އަންނަ ކަމަށެވެ.
އިންޑިޔާގެ ހަބަރު ފަތުރާ ވަސީލަތެއް ކަމަށްވާ އެންޑީޓީވީން އާންމުކުރި ހަބަރެއްގައި ބުނެފައިވަނީ އަދީބު ރާއްޖެ ފޮނުވާލާފައި ވަނީ އިންޑިއާ ކޯސްޓްގާޑުން ކަމަށެވެ. އިންޑިއާގެ ހަބަރުތައް ގެނެސްދޭ ވިއޯއިން ޓުޓިކޮރިން ފުލުހުންނާ ހަވާލާދީ، އާންމު ކޮށްފައިވާ ހަބަރެއްގައި ވަނީ އަދީބު ރާއްޖެ ފޮނުވާލާފައި ވަނީ އިންޑިއާގެ ކަނޑުގެ ސަރަހައްދަށް އެތެރެވުމަށް އަދީބު ބޭނުން ކުރެއްވި "ވާގޯ 9" ނަމަކަށް ކިއާ ޓަގުބޯޓުގައެވެ.
