އެކި މުނާސަބުތަކަ ގުޅުވައިގެން އިމާރާތްތަކާ ބިނާތައް ދިއްލުމަކީ ޒަމާނުއްސުރެ ދިވެހިންގެ ތެރޭގައި އޮންނަ އާދައެކެވެ. ގައުމީ އުފަލުގައި އެބަޔަކުވެސް ބައިވެރިވާ ކަމުގެ ރަމްޒަކަށް މިކަން ވެފައި އޮންނައިރު، އެއްބަޔަކު އަނެއްބަޔަކާ ވާދައަށް ދިއްލާ ދިއްލުންތައްވެސް މަދެއް ނޫނެވެ. އެއް އިދާރާ އަކަށްވުރެ ފުރިހަމައަށް އަނެއް އިދާރާއަކުން މިކަން ކުރާތީވެސް ފެނިފައި އެބަހުއްޓެވެ. ނުވަތަ ބޭރުގެ ކޮންމެވެސް ބިނާއެއް ވަކި ގޮތަކަށް ދިއްލާފައި ހުރީތީ އެކަން ކޮށްފައި ހުރީތީވެސް ފެނެއެވެ. ކޮންމެ މަގުސަތެއްގައި ނުވަތަ ނިޔަތެއްގައި ކުރި ކަމުގައި ވީ ނަމަވެސް ފުރިހަމަ ވެގެންދަނީ ދިވެހި ފަސްގަނޑުގެ މަލަމައްޗެވެ.
ފާހަގަކުރަމުން މިދާ ދިވެހި މިނިވަންކަމުގެ 54 ވަނަ އަހަރުގެ އުފާފާޅުކުރުންތަކާ ދިމާކޮށްވެސް އެކި އިމާރާތްތަކާ ބިނާތައް ވަނީ ދިއްލާފައެވެ. މުޅިންހެންވެސް ފެންނަނީ ދިވެހި ދިދައިގެ ކުލަތަކުން ދިއްލާފައިވާ ދިއްލުންތަކޭ ދެންނެވުމަކުން ދޮގަކަށް ނުވާނެއެވެ. ދިވެހިރާއްޖޭގެ ވެރިކަން ކުރާ މާލޭ ސިޓީގެ އެކި ހިސާބުތަކުންވެސް މިނިވަން ހަފުތާ ބަންދުގެ ރޭގަނޑުގެ ވަގުތުތައް ހިތްގައިމުކޮށްދޭ ކަމަކަށް މިކަން އޮތީ ވެފައެވެ.
ވިޔަފާރީއާއި އާންމު ބޭނުންތަކަށް މަގުތަކުގައި ހުންނަ އާންމު ދިއްލުންތައް ހިސާބަކަށް ނިވާލުމުން މަގުމައްޗަށް ނިކުމެ ކޮޅުކޮޅު މައްޗަށް ބަލާލުމުން ބޮޑެތި އިމާރާތްކާ ބިނާތަކުގެ ދިއްލުމުގެ ފުރިހަމަކަން އިތުރަށް ގަދަވެގެން ދާހެންވެސް ހީވެއެވެ. މިގޮތުން ލޮލުގައި އަޅައިގަތް އެންމެ ފުރިހަމަ އެއް ދިއްލުމަކީ، ދިވެހިރާއްޖޭގެ އެންމެ ބޮޑު އެއް ޓެލެކޮމް އޮޕަރޭޓަރު ކަމަށްވާ ދިރާގުގެ މައި އިމާރާތުގައި ދިއްލާފައިވާ ދިއްލުމެވެ. އިމާރާތުގެ ބޭރަށް ވާގޮތަށް ހުންނަ ކުލަބޮކީގެ ފާރު ގައުމީ ދިދައިން ދިއްލާފައި ހުރިއިރު، ގައުމީ ވިންދު ހިތުގައި ގަދަވެގެންދާ ފަދައެވެ.
އިންޓެނެޓް ޚިދުމަތް "ފިނިހަކަ" ދުވެލީގައި ލިބޭ ހަނދާންވެސް ފޮހެވިގެން ދިޔަ ފަދައެވެ. ނަތީޖާއަކަށްވީ ސޯޝަލް މީޑިއާ ޕްލެޓްފޯމުތަކުގެ މޮޑެލްއަކަށްވެސް މި އިމާރާތް ވެގެންދިޔަ ކަމެވެ. ރޭގަނޑުގެ ވަގުތުތަކުގައި ކޮންމެވެސް އުޅަނދެއްގައި ނުވަތަ ފައިމަގުގައި ނަމަވެސް ބޭރަށް ނިކުތް ގިނަ ބަޔަކު ވަނީ ދިރާގުގެ މައި އިމާރާތުގެ ފޮޓޯ ހިއްސާކޮށްފައެވެ.
ކަންމިހެން އޮތްއިރު ހިތަށް އަރާ ފައިބައިގެންދިޔަ ބޮޑު ސުވާލެއް އޮތެވެ. ވަކިން ހާއްސަކޮށް، ރާއްޖެއިން ބޭރުގައި ހުރި، ދުނިޔޭގެ އެންމެ އުސް އިމާރާތް ކަމަށްވާ ބުރުޖު ޚަލީފާ ދިވެހި ދިދައިގެ ތަސްވީރުން ދިއްލާލިއިރު، މިރާއްޖޭގައި ހުރި އެންމެ އުސް އިމާރާތުން އެފަދަ ކަމެއް ނުފެނުނީ ކީއްވެތޯ ސުވާލު ކޮށްލެވުނެވެ. އެންމެ ކައިރީގައި ހުރި ދިރާގުގެ މައި އިދާރާގެ ދިއްލުންގަނޑު، ބަސްހުއްޓުވާހާ ފުރިހަމަވިއިރު، މި ފަޅުކަން ވަކިން ބޮޑަށް އިހުސާސްކުރެވުނެވެ. 25 ބުރިއަށް އުފުލާ، މިވަގުތު ރާއްޖޭގައި އޮޕަރޭޓްކުރާ އެންމެ އުސް އިމާރާތުގެ ރެކޯޑް އޮތް ދަރުމަވަންތަ ހޮސްޕިޓަލު، ދިވެހި ގައުމީ ދިދައިގެ ކުލަތަކުން ނުވަތަ ގައުމީ ދިދައިގެ ތަސްވީރަކުން ދިއްލާލިނަމަ ހާދަ ފުރިހަމަ ވީސްތާއެވެ!
